Brandslagoffer Sean: Donasies stroom in

Sean in die hospitaal. Foto: Verskaf

Sean in die hospitaal. Foto: Verskaf

Donasies stroom in om Sean Smith (16), die tiener van Pretoria wat verlede Maandag erg gebrand het in ʼn fratsongeluk met petrol, dringend in een van die land se beste private hospitale met ʼn brandsorgeenheid oor te plaas.

Nagenoeg R500 000 van die aanvanklike R800 000 wat benodig word om Sean in ‘n private hospitaal se brandsorgeenheid te laat opneem, is Woensdagoggend ingesamel nadat Jacaranda 94.2 se Good Morning Angels-liefdadigheidsprogram Sean se storie met luisteraars gedeel het.

Sean is tans in ʼn stabiele toestand in die waakeenheid van die Dr. George Mukari-staatshospitaal in Ga-Rankuwa. Daar is egter nie ʼn brandsorgeenheid nie en sy geliefdes poog nou in alle erns om geld in te samel vir behandeling in ‘n private hospitaal. Daar word gehoop dat hy daar behandeling kan ontvang totdat daar ʼn bed beskikbaar is in die Chris Hani Baragwanath-staatshospitaal se oorvol brandsorgeenheid.

Mé-Lissa en Sean Smith. Foto: Verskaf

Mé-Lissa en Sean Smith. Foto: Verskaf

Volgens Anneri du Plooy, direkteur van die Hero Burn Foundation, ʼn nie-winsgewende organisasie wat ondersteuning bied aan en omsien na brandslagoffers en hul gesinne, is nagenoeg R3 miljoen na beraming nodig vir behandeling in ʼn private instelling as hy nie plek in dié staatshospitaal kry nie. Du Plooy het gesê daar lê nog maande se behandeling voor op sy pad na herstel

Sean, ʼn leerder en inwoner van Theresapark in die noorde van Pretoria, het verlede Maandagmiddag derdegraadse brandwonde aan sy hande, ken en nek en gedeeltes van sy rug, bors en arms opgedoen nadat sy hemp aan sy lyf aan die brand geslaan het in ʼn fratsongeluk met petrol. Hy het ook inwendige brandwonde opgedoen toe hy vlamme ingeasem het. Hy is na die Unitas-hospitaal in Centurion geneem waar die hospitaal hom op die hospitaal se onkoste behandel het totdat hy Vrydag na die Dr. George Mukari-staatshospitaal geneem is toe daar ʼn plek oopgegaan het en Sean sterk genoeg was. Hy word in afsondering in die waakeenheid behandel. Hy word onder verdowing gehou en is aan ʼn asemhalingsapparaat gekoppel.

Sean se ma, Mé-Lissa Smith, is ʼn enkelma met vier kinders en het nie ʼn mediese fonds nie.

Die Hero Burn Foundation help steeds Sean se geliefdes en ondersteuners om geld in te samel. Skakel 082 902 1133 of klik hier vir hul bankbesonderhede. Gebruik “Sean” as verwysing.

Lees ook: [Opvolg] Trane rol vir brandslagoffer Sean

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

39 Kommentare

jongste oudste gewildste
Dankbaar

Nog net R7 000.00 kort. Dit is wonderlik. Dankie dankie vir al die mense wat nog harte het in ons S.A. Ek is ene hoendervleis en vol trane. Baie dankie vir almal wat vir Shaun vandag help.
Sterkte Shaun ons bid vir jou. Die wereld is lief vir jou. Wens jy kon dit ook vanoggend beleef het. Sterkte en dink aan jou en jou ma en boeties.

CAV

Dit is verbasend dat die mediese wereld so duur is – veral as dit kom by lewensnoodsaaklike behandeling. Sterkte vir die gesin

Ruby

Ek het so gebid vir hierdie kind wat ek nie ken nie, ons sel groep ook.

Sean en sy mamma, julle gebede is gehoor, sterkte met die herstel pad.

Ek weet Sean gaan volkome herstel word.

Christa

Baie dankie aan Goodmorning Angels en hulle wonderlike luisteraars. Sover is R843000.00 ingesamel!!! Aan God al die eer!!!

anoniem

Baie sterkte aan Sean, my hart gaan uit vir jou seun, mag die Here jou styf in sy hande tou vou en beskerm. Sterkte aan Sean se ma en naaste familie, ons bid vir vinnige herstel vir Sean, ons dink aan julle in hierdie moeilike tyd. LIEFDE EN GENADE!!! GOD IS KONING EN HY SAL GENEES!!! Wees julle almal asseblief sterk en positief vir Sean se onthalwe. Word vining gesond.