Brendin Horner-moord: Verdagte al 16 keer in hegtenis geneem

Bheki Cele. Foto: Jairus Mmutle/GCIS

Een van die verdagtes wat in hegtenis geneem is in verband met die moord op die jong plaasbestuurder, Brendin Horner, is al 16 keer vantevore in hegtenis geneem.

Bheki Cele, minister van polisie, het Maandag tydens ʼn mediakonferensie gesê die ander verdagte in die saak is ook al twee keer vantevore in hegtenis geneem. Sekwetje Mahlamba en Sekola Matlaletsa is kort ná die moord op Horner in hegtenis geneem.

Die minister het gesê dit laat vrae ontstaan oor die strafregstelsel. “Ek sal graag wil weet hoekom ʼn persoon wat 16 keer in hegtenis geneem is nog ʼn kans kry om nog ʼn misdaad te pleeg.” Volgens Cele is dit ʼn kwessie wat deur die justisie-, misdaadvoorkoming- en veiligheidsgroepering bespreek moet word.

Cele het aan joernaliste gesê dat hy Maandagoggend voor die mediakonferensie met Julius Malema, EFF-leier, vergader het en dat hy binne die volgende 24 uur ook met Pieter Groenewald, VF Plus-leier, wil vergader. Die minister het verlede week gesê hy wil hê die twee leiers moet vergader om die Senekal-situasie te probeer ontlont.

Oor sy vergadering met Malema het Cele gesê: “Ons het ooreengekom dat ons volwasse moet optree en leierskap moet verskaf.”

Brendin Horner (21), ‘n plaasbestuurder, is wreed vermoor. (Foto: Facebook)

Die minister het benadruk dat die gebeure wat hom verlede week in Senekal afgespeel het nie herhaal mag word nie. “Dié keer sal ons gereed wees. Dié keer sal ons daar wees om die staat se eiendom te beskerm en die gesag van die staat te verdedig.”

Cele het ook tydens die mediakonferensie herhaal dat hy nie tydens ʼn onlangse imbizo oor plaasveiligheid in Normandien in KwaZulu-Natal gesê het dat boere nie moet huil wanneer hulle seerkry nie. Hy het gesê sy departemente sal die persombudsman nader rakende mediaberigte in die verband.

Cele, en sy eweknie by staatsveiligheid, Ayanda Dlodlo, sal intussen Dinsdag Horner se familie besoek. Siphiwe Dlamini, woordvoerder van die justisie-, misdaadvoorkoming- en veiligheidsgroepering, het gesê die vergadering met Horner se familie sal agter geslote deure plaasvind.

Die besoek volg ʼn week ná emosies buite die hof op Senekal, waar die twee verdagtes verskyn het, oorgekook het.

Honderde mense het na die hof opgeruk in ʼn spontane betoging teen landelike misdaad. ʼn Polisievoertuig is egter onder meer omgekeer en het aan die brand geraak. Skade is ook aan die hofgebou aangerig. André Pienaar is in verband met die voorval in hegtenis geneem. Hy sal vandag weer in die hof verskyn om te hoor of sy borgtogaansoek suksesvol was nadat hy die naweek agter tralies deurgebring het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

54 Kommentare

jongste oudste gewildste
Plaaskind

Klippies in ‘n leë blik, maak net geraas. Ons soek asksie Cele, nie net vergaderings en praatjies nie.

Frederik C

Hy moes dus laaaaankal bloubaadjie gekry het. Minimum 15 jaar. Daarna kan hy weer in die hof verskyn om sy vordering te monitor.

Androclus

16 keer nee man.Cele kort ‘n kop dokter.

Esta

En wat van Malema met al sy aanklagtes teen hom??

Chantel

Hy is reg om te sê die strafegstelsel nie reg is nie, maar in SA word die krimeneel beter behandel as die se slagoffer.