Brits-plaasmoord: Polisie op soek na jong man se moordenaar

Leander Dercksen (22). Foto: Verskaf

Die polisie in Brits, Noordwes, is op die spoor van ʼn groep mans wat verlede naweek Leander Dercksen (22) op ʼn plaas gekaap en doodgeskiet het.

Ao. Mpeile Talane, woordvoerder van die Brits-polisiestasie, het Woensdag aan Maroela Media gesê Dercksen se gekaapte voertuig, ʼn Mazda Drifter-bakkie, is op 3 April opgespoor. “Die polisie is op die spoor van die verdagtes wat aan sy kaping en moord verbind kan word,” het Talane gesê. “Die ondersoek is in ʼn sensitiewe stadium en ons verwag om binnekort ʼn deurbraak te maak. Ons kan in die stadium nie te veel inligting bekend maak nie.”

Dercksen, van Soutpansdrift naby Brits, is op 29 Maart op ʼn plaas in die omgewing gekaap, waarna hy geskiet en met ʼn skerp voorwerp doodgesteek is. Sy liggaam is in die veld op die plaas gestort. Hy was veronderstel om op die plaas te oornag om na ʼn bejaarde egpaar om te sien. ʼn Vriend het die volgende oggend op sy liggaam afgekom.