Britse musikus in Durban-natuurreservaat vermoor

Simon Milliken. Foto: Val Adamson

Die moord op ʼn 60-jarige Brit in KwaZulu-Natal maak internasionaal opslae.

Simon Milliken (60) is Vrydagmiddag in die Burman Bush-natuurreservaat in Morningside, Durban, met ʼn mes gesteek. Sy liggaam is eers Saterdag uit die natuurreservaat verwyder.

William Charlton-Perkins, ʼn vriend van Milliken en besturende direkteur van die reklamefirma Copy Dog, het gesê Milliken het die dirigent Peri So van Hongkong op ʼn uitstappie geneem deur die reservaat toe die voorval plaasgevind het.

Kol. Thembeka Mbele, woordvoerder van die polisie, het bevestig die twee mans is in die natuurreservaat aangeval. Volgens Mbele is een van die mans beroof, maar kon daarin slaag om ongedeerd weg te kom.

Milliken se liggaam is Saterdagoggend deur soek- en reddingswerkers uit die reservaat verwyder. Hy het verskeie steekwonde opgedoen, volgens Mbele. Die polisie ondersoek sake van moord en roof en niemand is al in hegtenis geneem in verband met die voorval nie.

Volgens Charlton-Perkins was Milliken ʼn kranige voëlkyker. Hy het die dag voor sy dood onder So se leiding opgetree tydens die KwaZulu-Natalse Filharmoniese Orkes se Lentekonsert in die stadsaal.

Milliken was kontrabasspeler in die orkes. Hy het verlede jaar uit die orkes afgetree, maar nog gereeld saam met hulle opgetree.

Die breër musiekgemeenskap het hul skok en hartseer oor Milliken se dood uitgespreek en huldeblyke stroom in.

Cathy Peacock, ʼn nabye vriend van Milliken en musikus, het die voorval as ʼn vreeslike tragedie beskryf. “Dit was altyd ʼn vreugde om by Simon te wees. Ek het hom liefgehad oor sy humor, sy heelhartige genot van die lewe, sy passie vir opera en sy vriendelike belangstelling in die mense rondom hom.”

Michel Schneuwly, stigtersdirekteur van Baroque 2000, het sy hartseer uitgespreek oor die verlies van ʼn jare lange vriend. “Simon was ook ʼn stigterslid van Baroque 2000. Ek en my vrou, Trui, het ʼn spesiale vriendskap met Simon gehad en sal hom verskriklik mis.”

Die moord op Milliken het ook internasionaal opslae gemaak met talle oorsese nuusagentskappe en -webwerwe, waaronder The Sun, Daily Mail en The Times, wat daaroor berig het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

16 Kommentare

jongste oudste gewildste
Paul

Welkom in Sa

eugene

wat se tannie Theresa nou na haar besoek

marous

Afrikaners word elke dag vermoor op die wreedste denkbare wyse , en geen brit raak geskok en hartseer daaroor nie . Jammer me may is so vining weg , sonder om op ‘n uitsappie te gaan ….vinger alleen .

Stef

Daar gaan nog ‘n paar Rmiljoen aan toeriste inkomste. Amandla!

Elene Wentzel

Huldeblyke word waardeer maar die persoon is weg vir altyd. Ons kan nie eers meer gn stap op ons eie mooi plaas nie want ons weet nie of ons veilig sal wees nie!