Brody se stert swaai al weer ná klapper-marteling

Brody is op die herstelpad nadat hy erg beseer is toe kinders glo ‘n klapper in sy oor laat ontplof het. By hom is Tebogo Maswanganye, ‘n inspekteur van die DBV. (Foto: Bloemfontein-DBV)

Brody, ʼn steekhaarbrakkie van Bloemfontein wat ernstig beseer is toe ʼn groep kinders glo vuurwerk in sy oor gedruk het, is weer op die been – soveel só dat hy nou al selfs sy stertjie begin swaai.

Maroela Media het vroeër berig Brody is in Winburg gevind nadat ʼn ouma op die dorp gesien het hoe drie kinders van omtrent tien jaar oud eers ʼn klapper na die hondjie gooi en toe ʼn klapper in sy oor laat ontplof het. Die vrou het die Dierebeskermingsvereniging (DBV) in Bloemfontein ontbied nadat sy vergeefs probeer het om die kinders te keer.

Ten spyte van die DBV se soektog na die hond was daar geen teken van hom nie. Die DBV het verlede Donderdag wéér ʼn oproep gekry, dié keer van ʼn inwoner wat ʼn hondjie in ʼn mangat gekry het. Die hond was ernstig beseer en sy oor bykans afgeruk.

Dit was Brody.

Tebogo Maswanganye, ʼn inspekteur by die Bloemfontein-DBV, het gesê Brody se linkeroor is Maandag geamputeer. Die oorskulp is deur die vuurwerk bykans afgeruk en die veearts het geen ander opsie gehad as om dit heeltemal af te sny nie.

Brody hoor steeds goed met albei ore.

Hy ontvang in dié stadium ook nog behandeling vir ʼn hardnekkige infeksie. Maar, sê Maswanganye, Brody is beslis op die herstelpad en leer stadigaan weer om mense te vertrou.

Daar was verskeie aansoeke om Brody aan te neem en ʼn tuisinspeksie is al by ʼn voornemende aanneemhuis gedoen.

Maswanganye sê Brody gaan egter nog ʼn paar dae by die DBV bly sodat hulle kan verseker hy genees behoorlik.

Daarna is dit huis toe, na ʼn nuwe, permanente tuiste.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

40 Kommentare

jongste oudste gewildste
wielie

Ek hoop julle wys daardie kinders WAT hulle aan daardie arme dier gedoen het! Hoop hulle word gestraf ………….. SIES man het julle geen gewete ???

Amanda

So bly vir Brody op sy tweede kans op die lewe

Helena.

Wees ASSEBLIEF tog net goed en lief vir die ou hondjie..wie ookal die diertjie aan neem..
Wat word van die kinders en ouers wat die dierjie soveel skade en lyding aan gedoen het?

Fiefie

Dit is goeie nuus en ek hoop hy kry regtig ‘n goeie liefdevolle huis Hopelik is daar ook gesoek na daardie onhebbelike seuns wat die verskriklike daad gedoen het. Hulle moet erg gestraf word.

CK

Hoe SIEK is dit nie, om nie eers te praat van die kinders nie. Nee regtig, ek HAAT mense wat weerlose diere mishandel. Ek raak rooi onder die kraag. Ek hoop hy kry ‘n liefdevolle huis.