Bronkhorstspruit-plaasaanval: Egpaar se toestand onveranderd

Waldi en Cynthia van Zyl (Foto: Verskaf)

Die egpaar wat Sondagaand op hul plaas digby Bronkhorstspruit in Gauteng deur ses aanvallers oorval en erg aangerand is, se toestand is onveranderd sedert die aanval.

Waldi van Zyl (64) en sy vrou, Cynthia (53), is steeds in die hospitaal nadat hulle vermoedelik tussen 17:00 en 18:00 deur die aanvallers op hul plaas, Spitskop, oorrompel en gemartel is.

Vasti Mills, koördineerder van die Bronkhorstspruit-veiligheidinligtingsnetwerk (BVIN), is in verbinding met die Van Zyl-egpaar se familie en sê hul toestand is grootliks onveranderd sedert Sondagaand. Waldi is in ʼn hospitaal in Alberton en Cynthia in ʼn hospitaal in Emalahleni (Witbank).

Waldi veg om sy lewe in die hospitaal se waakeenheid.

“Waldi is stabiel, maar steeds in ʼn kritieke toestand. Hy is steeds onder sedasie en nog nie by sy volle bewussyn nie,” vertel Mills. Sy sê die dokters sukkel nog met die wond op sy been en het intussen die aar wat afgesny is, gevind.

“Sy brein is ook baie geswel en hy is in geweldige pyn en daarom sedeer hulle hom nog baie swaar.”

Mills sê Cynthia is erg getraumatiseerd na die voorval en sukkel met erge hoofpyn. Sy is intussen van die waakeenheid na ʼn gewone saal oorgeplaas. “Sy gaan moontlik vir nog breinskanderings moet gaan.”

Waldi het onder meer gesig- en skedelfrakture en wonde aan sy been opgedoen en moes dieselfde aand na die aanval ʼn noodoperasie ondergaan. Cynthia het ʼn kopwond opgedoen en het kneusplekke oor haar hele lyf en snye aan haar bene.

“Met Covid-19 kan die Van Zyls se familie hulle nie besoek nie, wat die situasie vererger.”

Volgens konst. Munyadziwa Ramovha, woordvoerder van die Bronkhorstspruit-polisiestasie, ondersoek die polisie ʼn saak van huisbraak. Al ses verdagtes is steeds op vrye voet.

Waldi was die aand in sy werkswinkel op die plaas besig toe hy skielik deur die ses mans oorrompel is. Ten minste een van hulle was met ʼn vuurwapen gewapen.

Hy het om hulp geroep en Cynthia het ondersoek gaan instel en op die aanvallers afgekom terwyl hulle besig was om haar man aan te rand. Sy is daarna ook aangeval.

Die egpaar is glo met houtplanke en pype geslaan. Een van Waldi se bene is glo met ʼn hoekslyper gesny en Cynthia is met ʼn skroefbek aangerand.

Die aanvallers het ʼn groot bedrag geld geëis.

Die aanvallers is met twee vuurwapens, juwele, selfone en ʼn klein bedraggie geld en ander huisware vort. Hulle het hul buit op Waldi se wit Toyota Hilux-bakkie gelaai en in die rigting van die R104 gevlug. Van daar is hulle moontlik in die rigting van Bronkhorstspruit of Witbank.

Die Van Zyls se seun het kort na die aanval by die huis gekom. Cynthia het intussen haarself losgewikkel en hom geroep, waarna die nooddienste, polisie en gemeenskapslede ontbied is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

19 Kommentare

jongste oudste gewildste
Suzette

‘n Saak van huisbraak? Dit is poging tot moord!!!

Persheks Adri

Bring die verdomde kommandolede terug! Ons boere is verby dik vir die sinnelose aanvalle!

En Cele sê steeds dis vakansie misdaad die slim man mens sy groot hoed! Useless verby

Lorna

Daar word so baie optogte gehou en vreedsaam maar vertel my wat help dit??????
Niks
Ons is n bedreigde spesie
Onse Vader tree in asb ons kan onself nie help nie asb
Sterkte aan al2 van julle

Tokkel

Huisbraak? Cele moet vir ‘n slag sy oë oopmaak en dan praat, want dit lyk my hy sien niks raak nie. So word ons boere uitgemoor dan word dit afgeskryf as huisbraak…iets om oor te braak ja!! Mens wonder net wie sit agter hierdie goed op onskuldige mense!! Sterkte aan julle en die familie.

Dries

Hopelik hoor ons spoedig in die nuus dat Bekkie Cele hierdie amper vermoorde egpaar in die hospitaal gaan besoek het om sy kommer te wys, soos wat hy in ander gevalle van misdade teen mense al gedoen het.