Buchan kanselleer Loftus-gebedsaamtrek

Die evangelis Angus Buchan. (Foto: Shalom Ministries)

Die evangelis Angus Buchan het die “Staan op vir Jesus”-gebedsbyeenkoms wat in Februarie aanstaande jaar by die Loftus-stadion in Pretoria gehou sou word, gekanselleer.

Hy het die aankondiging ʼn paar uur gelede op sy Facebook-blad gedoen.

ʼn Herrie het om die prediker se kop losgebars ná ʼn bemarkingsvideo van die byeenkoms versprei is waarin gehoor kan word hoe Buchan sê dat daar “onthou moet word dat slegs twee nasies ter wêreld ʼn verbond met die God van Abraham, Isak en Jakob het. Dit is Joodse mense en Afrikaanse mense”.

Buchan het dié stelling later onvoorwaardelik teruggetrek en om verkoning gevra vir enige pyn of verdeeldheid wat dit moontlik veroorsaak het.

Die EFF het verlede week nietemin aanstoot geneem en Godrich Gardee, die party se sekretaris-generaal, het selfs so ver gegaan as om op Twitter te sê kleefmyne moet voor die byeenkoms om die stadion geplant word om te sien wat dan met God se verbondsvolk gebeur.

Gardee het die stelling later teruggetrek, terwyl die burgerregtegroep AfriForum besluit het om ʼn klagte van aanhitsing van geweld teen hom aanhangig te maak.

Buchan het Dinsdag in die inskrywing gesê “ek is baie jammer oor wat gebeur het, ek vra om verskoning, ek bely en verwerp die idee van enige spesiale nasie. Ek vra dus vir julle vergifnis”.

Hy het gesê hy is self ʼn boer en dat die ervaring van een van die ergste droogtes in Afrika suid van die Sahara – en die ongekende skade wat dit fisiek, verstandelik en geestelik veroorsaak het – hom “gebreek” het.

“My enigste bedoeling was om te bemoedig en om hul lyding te verlig deur hulle te herinner dat God hul nooit sal verlaat of versaak nie (Hebreërs 13:5),” het Buchan in ʼn hartroerende en baie persoonlike boodskap geskryf.

“My mense is die weduwee en die weeskind, die bankrot sakeman, die gevangene wat al 25 jaar in die tronk sit sonder die moontlikheid van parool. Die persoon in die intensiewe sorgeenheid vir wie daar gesê is daar is geen omdraaikans nie.

“Die ma wat my bel en vra dat ek vir haar en haar vier klein kindertjies bid wat saam met haar in die kombuis van hul klein plaashuis sit, waar hulle die dood van haar man, wat homself geskiet het omdat hy nie die droogte meer kon hanteer nie, probeer verwerk,” het hy gesê.

Hy het gesê sy mense is die jong man wat nie verder kan gaan studeer nie omdat sy enkelma dit nie kan bekostig nie. “Of die pensioenaris wat sy hele kudde (wat uit drie diere bestaan het) verloor het en my vra om vir hom te bid.”

Buchan het gesê hy wil help om Suid-Afrikaners aan mekaar en aan God te verbind.

“Ons het ʼn lang pad as ʼn land gestap om te kom waar ons vandag is en my optrede en uitlatings was betreurenswaardig. Ek het vandag met die Christian Leaders Forum vergader en om vergifnis vir die uitlatings gevra. Ek bely dit ook hiermee.

“Ek het die beoogde byeenkoms by die Loftus-stadion in Februarie volgende jaar gekanselleer,” het Buchan bygevoeg.

Honderde mense het op die plasing gereageer en hul steun aan Buchan toegesê. Talle het hom ook geloof vir die manmoedigheid wat hy gewys het deur die verskoning.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

192 Kommentare

jongste oudste gewildste
Sophia

Meeste mense het die doel van hierdie byeenkoms heeltemal verkeerd verstaan omdat hulle nie behoorlik kan lees en verstaan nie. Hulle vat ‘n woord of deel van ‘n sin en hardloop daarmee! Wat ‘n jammerte!! Oom Angus, ek vra namens ons volk vir u om verskoning!!!

Haan

Wys asseblief vir my waar in die Bybel God n verbond met die Jode maak??
Israel =/= Juda. Israeli =/= Israeliet

Lukie Carelsen

Angus het niks verkeerd gesê nie.
Dit is ‘n droewige dag vir Suid Afrika.

Andrea

Hou net asb op met verskoning vra! Liewe genade!!!

Kasper

Jammer ou maat, jy is geweeg, en hopeloos te lig bevind. Vir iemand wat hom voorgee as ‘n prediker , laat jy jouself maar baie gou van stryd bring deur die polities korrekte euwel van die modern samelewing.