Burgemeester geskok oor uitslag van ‘paraffien-water’

Fawzia Peer, waarnemende burgemeester van eThekwini (Foto: African News Agency/ANA)

Die waarnemende burgemeester van eThekwini-munisipaliteit (Durban), Fawzia Peer, het gesê die laboratoriumuitslag van ʼn waterbottel wat na bewering vloeistof bevat het wat soos paraffien geruik het, het bevestig die water was skoon.

Peer het Dinsdag die uitslag met die African News Agency (ANA) bespreek ná ʼn sitting van die uitvoerende komitee by Durban-stadsaal.

“[Die speaker het ʼn e-pos na my gestuur] en ek het sopas gehoor die water was skoon. Ek is geskok om te hoor dat die water skoon was en dat [die toetse] intern gedoen is, en dat ʼn ander monster nie na ʼn eksterne laboratorium gestuur is nie,” het sy gesê.

Speaker William Mapena het vroeër Dinsdag gesê hy weier om aan ANA te bevestig dat die uitslae gefinaliseer is en dat die uitslag negatief was.

Paraffien is na bewering verlede maand in Peer se waterbottel bygevoeg tydens ʼn raadsitting by die stadsaal. Sy het ʼn slukkie gevat van die waterbottel voor sy die vergadering verlaat en na ʼn hospitaal gehaas is.

Speaker Mapena het in daardie stadium aan raadslede gesê hulle moenie die gebottelde water drink nie, aangesien dit wil voorkom of “paraffien by iemand se water gevoeg is”.

Die bottel is vir toetse gestuur na die eThekwini- munisipale laboratorium en Peer het die volgende dag teruggekeer werk toe ná sy behandeling ontvang het vir brandwonde aan haar lippe, tong en keel.

“Ek dink wat ons uit dié voorval leer, is dat die bottel nie behoorlik getoets is nie. Maar ons leer uit ons foute,” het Peer aan ANA gesê. Sy het gesê die polisie het aan haar gesê hulle moes “onmiddellik” ontbied geword het om die bottel te seël en die inhoud daarvan te toets.

Vier mense het op die dag van die voorval aan die water geruik, het Peer bygevoeg. “Die hoofsweep (ANC-raadslid Nelly Nyanisa) het eerste daaraan geruik. Ek het die bottel vir haar gegee en gesê dat dit my mond brand. Sy het dit geruik en gesê ek moet dit neersit, omdat dit paraffien is.”

Nyanisa het daarna die bottel aan raadslid Sipho Kaunda gegee. “Ons het almal bymekaar gesit. Kaunda het dit toe vir raadslid Barbara Fontein gegee. Almal het paraffien geruik. Die speaker wou toe weet wat aangaan. Ons het die bottel vir die speaker gegee, hy het dit geruik en ʼn aankondiging gemaak dat niemand die water moet drink nie.”

ʼn Paar munisipale werknemers het ten tyde van die voorval aan ANA gesê Peer kan soms oordryf. “Sommige mense dink dit is ʼn grap, maar ek is vreesbevange,” het sy gesê. “Ek moet nou baie versigtig weer met enigiets wat ek eet of drink. Ek koop my eie kos en ek dra my eie waterbottel, wat dalk laf kan klink.”

Beeldmateriaal van die voorval word ondersoek, het sy bygevoeg. Die provinsiale polisiekommissaris het ook ʼn ondersoekbeampte gestuur om haar te ondervra.

Peer is in ʼn waarnemende hoedanigheid aangestel in die plek van burgemeester Zandile Gumede, wat deur die ANC op verlof geplaas is ná bewerings van korrupsie wat verband hou met ʼn tender in 2016 van R208 miljoen.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

21 Kommentare

jongste oudste gewildste
SjN

Shame, toe regte water, wat mense nie doen om aandag te trek nie.

Veronica

SjN, hoe kan skoon water haar keel, lippe en tong brand? Lw sy is hispitaal toe geneem, só: sjame vir jouself! Ander het ook parrafien geruik!

Gert van Wierdapark

Toe sy die uitslag kry, toe “skrik sy seker haar Water” weg!

Uilspieel

Ag hel. SjN en Gert, julle kan darm simpel nonsens praat! Dit is mos nou duidelik dat hierdie storie toegesmeer word! Party keer dink ek van hierdie mense tik net sonder om te dink! Die mense wat agter dit sit sal mos nou natuurlik nie uitgevang wil word nie

tg

brandwonde van parrafien lol