Burgemeester, nog 2 in hof oor tender

Zandile Gumede, burgemeester van die Ethekwini-metromunisipaliteit. Foto: Bongani Mbatha/ANA

Die ANC in die eThekwini-streek het Dinsdagoggend gesê hy neem kennis daarvan dat die plaaslike burgemeester, Zandile Gumede, vroeër vandag in die Durbanse handelsmisdaadhof verskyn het op aanklagte van korrupsie, bedrog en rampokkery.

Gumede het verskyn saam met Mondli Mthembu, die adjunkstreeksekretaris, in verband met beweerde bedrog rakende ʼn tender in Durban se departement vir vaste afval waardeur diensverskaffers na bewering groot bedrae geld betaal is, maar geen dienste gelewer is nie.

Brig. Hangwani Mulaudzi, woordvoerder van die Valke, het vanoggend bevestig drie amptenare verbonde aan die Ethekwini-metromunisipaliteit sal saam in die beskuldigdebank wees, maar hy het geen name genoem nie.

Bheki Ntuli, die ANC se streeksekretaris, het egter twee van die verdagtes as Gumede en Mthembu geïdentifiseer.

Ntuli het gesê die party verbind hom tot die beginsel van onskuldig tot skuldig bewys en onderwerp hom aan die mag van die gereg en die beginsels van natuurlike geregtigheid. “Ons weet egter dat die hof van openbare opinie nie aan dieselfde beginsels onderwerp word nie. Daar doen ons ʼn beroep op almal om die hof te respekteer as die enigste bekwame liggaam om ʼn beslissing hieroor te maak,” het Ntuli gesê.

“Ons is bewus van die politieke en openbare implikasies van die proses wat aan die gang is en hoop dat die saak gou afgehandel sal word.”

Maroela Media het vroeër berig daar is reeds vandeesmaand nege mense, onder wie die departement se adjunkhoof, Robert Abbu (62), en die stad se verskaffingskettingbestuurder, Sandile Ngcobo (41), in hegtenis geneem op aanklagte van bedrog in verband met dieselfde tender.

Hulle het reeds in die handelsmisdaadhof verskyn. Die ander beskuldigdes in die saak is diensverskaffers.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

16 Kommentare

jongste oudste gewildste
fred

stem saam….maar daar is nog baie..
ongelukkig is korrupsie nie n misdaad nie…kyk na die kies resultate

marous

Wat gaan die bedrag vir borg wees ?

Jr

Ja maar juffrou Barkhuizen en Steve is skuldig voordat hulle onskuldig bewys is. NOU HOE NOU?

Willie

Daai foto spreek boekdele…

Grysburger

Aitsa! Wonder waar gaan Haar Edele die Burgermeester ‘n ambassadeurspos losslaan?