Busse gebrand, met klippe bestook toe taxi’s staak

Foto: ANA.

Minstens twee busse is vroegoggend in Khayelitsha in Kaapstad aan die brand gesteek en ʼn derde een met klippe bestook toe taxi-operateurs begin staak het.

Die staking gaan na wat verneem word oor die ʼn leierskapsdispuut by die South African National Taxi Council (Santaco) se provinsiale tak.

Brett Herron, burgemeesterskomiteelid vir vervoer en stedelike ontwikkeling, het op Twitter bevestig dat twee Golden Arrow-busse aan die brand gesteek is in Khayelitsha.

Herron het verder gesê dat die MyCiti-busdienste in Khayelitsha-Oos en -Wes tot verdere kennisgewing opgeskort is. “Die staking deur die taxi-operateurs mag dalk die MyCiti-busdiens in Kaapstad ook beïnvloed,” het Herron gesê.

Golden Arrow het op sy Facebook-blad laat hoor dat geen busdienste tans in Khayelitsha beskikbaar is nie en dat die maatskappy sy busdienste na Delft en Nyanga ook moes opskort.

Golden Arrow het gesê pendelaars kan slegs van die buitewyke vervoer word.

Een gebruiker het gesê dit beteken nou dat hulle tot by die N2 moet loop om ʼn bus te haal en Golden Arrow het terug laat weet: “Ongelukkig ja, totdat ons jou en ons bestuurders se veiligheid kan waarborg.”

Verder het die busdiens gesê hy hou die situasie fyn dop.

Lt.kol. André Traut, woordvoerder van die polisie, het gesê polisiebeamptes is in verskeie dele van die Wes-Kaap ontplooi om wet en orde te handhaaf tydens die staking deur die taxi-operateurs vanoggend.

“Twee busse is aan die brand gesteek in die Khayelitsha-omgewing en een is met klippe bestook,” het Traut gesê.

Volgens Traut is sake van openbare geweld aanhangig gemaak en word dit deur die polisie ondersoek.

Niemand is nog in verband met die voorval in hegtenis geneem nie.

“Ons beamptes sal op hoë gereedheidsgrondslag bly in die omgewings wat deur die staking geraak word,” het Traut gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

22 Kommentare

jongste oudste gewildste
AmY

Wanneer gaan hierdie sinneloosheid eendag end kry?

Johan

Party mense se ingesteldheid laat veel te wense oor. Miskien het dit tyd geword om die begrip “sabotasie” uit te brei en sommer baie sterker wette daarteen in te stel. Daar sal nuwe gevangenisse gebou moet word en die skuldiges moet jare lank toegesluit word. Dit is n uitstekende geleentheid om die boewe van die strate te hou en om werk te skep (bouwerk en gevangenis-personeel)

Sharem

Ek kan nie eers n hoop blare op my eie erf aan die brand steek sonder om tronk toe te gaan nie; wat laat mense waardevolle busse aan die brand steek en skotvry daarvan afkom?

Stephen Namibia

“Affirmative action” is die ou wat vanoggend vir die bus wag wat hy gister aan die brand gesteek het.

Jannie

Brand, breek af, plunder, roof, vernietig – dit los AL jou probleme op , vul jou honger maag en sit ‘n dak oor jou kop!!! Afrika-verhaal!!!