Carl Pistorius. Foto; Werner Beukes/Sapa
Carl Pistorius, Oscar Pistorius se broer, is uit die hoësorgeenheid van die Pretoria-Oos-hospitaal ontslaan nadat hy vroeër vandeesmaand in ʼn ernstige botsing buite Modimolle, Limpopo, betrokke was.
“Carl het veelvoudige beserings tydens die ongeluk opgedoen,” het Anneliese Burgess, woordvoerder van die Pistorius-familie, Dinsdag in ‘n verklaring gesê. “Hy het skeurwonde aan sy hart en lewer opgedoen en ophou asemhaal,” het sy gesê.
Hy is verlede week uit die intensiewesorgeenheid van die hospitaal ontslaan, maar bly nog vir die volgende twee weke in die hospitaal vir verdere operasies. Hy sal ook vir rehabilitasie moet gaan om van sy beweegbaarheid te herwin.
“Carl is dankbaar vir die ondersteuning wat hy van sy famile, vriende en die publiek ontvang het,” het Burgess bygevoeg.
Die ongeluk het op 1 Augustus op die N1-snelweg buite Modimolle plaasgevind toe ‘n ander motor Carl se motor reg van voor getref het. Carl moes met meganiese toerusting uit die wrak gesny word. Hy en die bestuurder van die ander motor is albei met ernstige beserings na hospitale geneem vir verdere behandeling.
Die twee passasiers in Carl se motor is nie in die ongeluk beseer nie.
Lees ook:
Carl Pistorius steeds in hoësorgeenheid
Polisie ondersoek Carl Pistorius-ongeluk
Carl Pistorius “buite gevaar” ná ongeluk
