Caster en die ‘rassistiese’ skoene

Die paar Nike-tekkies wat die omstredenheid veroorsaak het

ʼn Herrie het vandeesweek op Twitter uitgebars oor ʼn paar blou-wit-en-oranje Nike-tekkies wat Caster Semenya, ʼn Suid-Afrikaanse atleet, op haar profiel gedeel het.

In die inskrywing, wat deur talle ander foto’s van Nike se skoene gevolg is, sê die steratleet dat sy baie van die skoene hou. “Love your kicks,” lui die inskrywing. Die twiet was egter volgens baie Suid-Afrikaners onsmaaklik, omdat die kleure van die skoen hulle aan die ou Suid-Afrikaanse vlag herinner.

Maroela Media het in Augustus berig die gelykheidshof, wat in die hooggeregshof in Johannesburg sit, beslis het dat die vertoon van die ou Suid-Afrikaanse vlag in ʼn sekere konteks op haatspraak neerkom.

Talle van Semenya se volgelinge op die sosialemediaplatform het haar uitgejou en gesê dat sy onkundig is en die ou vlag bemark aan verbruikers wat haar as ʼn rolmodel beskou.

Selfs Fikile Mbalula, die minister van vervoer, het gal gebraak oor dié skoene. In sy inskrywing het die minister gevra, “Wat is dié kleure? Lyk soos die apartheidsvlag.” Semenya het teruggekap en foto’s van die Johannesburgse metropolisie se motors gedeel, wat ook in oranje, wit en blou geverf is. Ander verbruikers het aan Mbalula verduidelik dit is dieselfde kleure van die vlag van New York en ander het daarop gewys dat e-tolborde in Gauteng ook met dié kleure geverf is.

Ernst Roets, hoof van beleid en aksie by AfriForum, wat onlangs ook in die hof moes draai ná hy volgens die Nelson Mandela-stigting (NMS) die uitspraak geminag het deur ʼn foto van die vlag te twiet, het ook sy stuiwer in die armbeurs gegooi. “Het sy nou net haatspraak gepleeg?” wou Roets weet. Die Konstitusionele Hof het besluit om die NMS se aansoek om verlof tot appèl oor die vlagtwiet-saak uit te gooi. Die hof het AfriForum en die NMS in kennis gestel dat dit nie in belang van geregtigheid is dat die appèlsaak aangehoor word nie. Die hof het nie ʼn kostebevel gemaak nie.

In Oktober vanjaar moes Woolworths ʼn wit, blou en oranje Country Road-sak van sy rakke verwyder na ongelukkigheid oor dié sak ook op sosiale media gedeel is. Die handelaar het om verskoning gevra.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

71 Kommentare

jongste oudste gewildste
Koos de Meyer

Dit is nou regtig belaglik. Wat nou nog meer.

Vra net

Hoe lank voor die oranje, wit en blou kleurkryte verban word? Dan volg daar seker ‘n verbod op verwe van daai kleur. Wat is volgende, verbanning van blou lug, wit seeskuim en oranje sonsondergange? Totaal onsinnig.

Biebie

Ek het nie woorde hiervoor nie HAHAHAHAHA HAHAHA HAHAHAHA
*P. A. T. E. T. I. E. S* Gaan hul ons nou verbied om daai kleure te dra? Wens hul wil ophou om dit die ‘apartheidsvlag’ te noem. Dis die ou Suid-Afrika vlag.

tom

Ha ha lekker ne

Spike

Die MOOISTE tekkies wat ek nog gesien het.