Die sewende Diamantliga-byeenkoms het Saterdag (30 Junie) in Parys plaasgevind en dit was Suid-Afrika se Caster Semenya wat weer die kollig gesteel het.
Semenya het haar persoonlike beste tyd in die 800 m aangeteken toe sy geseëvier het in 1 minuut 54.25 sekondes. Haar vorige beste tyd was 1:55.1. Semenya het daarmee haar derde goue medalje in vanjaar se Diamantliga-reeks gewen.
Ander Suid-Afrikaners wat in Parys in aksie was, sluit in Akani Simbine wat sy beste tyd dié seisoen in die 100 m vir mans aangeteken het. Simbine se tyd was 9.94 sekondes. Ronnie Baker van Amerika het die wedloop in 9.88 sekondes gewen.
Antonio Alkana het in die 110 m-hekkies ʼn vierde plek behaal in ʼn tyd van 13.32 sekondes. Daar was ook ʼn vierde plek vir Luxolo Adams in die 200 m in 20.21 sekondes.
Die volgende byeenkoms in die reeks word op 5 Julie in Lausanne, Switserland, aangebied.
Die reeks van 12 byeenkomste en twee finale eindig op 30 Augustus.
Meer inligting is beskikbaar by: https://www.diamondleague.com/iaaf-diamond-league/
Trots op haar, baie geluk Caster.