Cele beweer meeste polisiehulpbronne in Wes-Kaap, KZN

Die ministerie van polisie neem deel aan ‘n gemeenskapsvergadering in Mitchells Plain in die Wes-Kaap (Foto verskaf)

Bheki Cele, minister van polisie, sê die Wes-Kaap en KwaZulu-Natal het van die hoogste misdaadsyfers en ontvang steeds die meeste polisiëringshulpbronne en finansiering om vrede en stabiliteit in die provinsies te bewerkstellig.

Cele het Vrydag, tydens ʼn ministeriële gemeenskapsvergadering in Mitchells Plain in Kaapstad gesê die SAPD tot dusver die meeste hulpbronne in dié twee provinsies ontplooi in vergelyking met al die ander provinsies landswyd.

Tydens die vergadering het inwoners hul eise en polisiëringskommernisse bekendgemaak aan die ministerie van polisie en polisiebestuur. Lede van die gemeenskap het die platform gebruik om met die SAPD te gesels oor kwessies soos kindermoorde, ontvoering, geslagsgebaseerde geweld, bendebedrywighede en dwelmmisbruik.

Cele het die gemeenskap gerus gestel dat hul versoeke nie op dowe ore val nie en dat beskikbare hulpbronne en meer polisiebeamptes verder ontplooi sal word vir beter polisiëring in die gebied en alle ander gebiede in die Wes-Kaap.

Gemeenskapsvergadering met die ministerie van polisie in Mitchells Plain (Foto verskaf)

“Ons sal nooit die oorlog wen as ons nie met die gemeenskappe saamwerk nie – veral nie in dié provinsie nie,” het Cele gesê. “As ons nie nou met die provinsiale en nasionale strukture en gemeenskapstrukture saamwerk nie, sal ons die gemeenskap versaak.”

Die minister het toegegee dat daar nog baie gedoen moet word om kriminaliteit in Mitchells Plain uit te roei, maar het benadruk dat die Wes-Kaap die leeueaandeel geniet wat polisiehulpbronne betref.

“Van al die provinsies het die Wes-Kaap die meeste hulpbronne – bo en behalwe die toegewyde provinsiale begroting. Ons het besluite geneem deur misdaadneigings te analiseer en spesiale operasies soos die teenbende-eenheid (AGU) aangestel. Daar was ook spesiale operasies soos Operation Thunder en Operation Lockdown en ʼn taakspan wat uitbuiting en taxigeweld ondersoek. Meeste van dié ingrypings is uniek aan die provinsie en werp vrug af. Die gemeenskappe kan saamstem dat die lewe dalk nie perfek is nie, maar daar is beslis verbetering.”

Die ministerie van polisie het kennis geneem dat 200 ekstra polisiebeamptes van verskeie provinsies in die Wes-Kaap herontplooi is om polisiëring in die provinsie by te staan. Sedert 2018 is meer as R350 miljoen spandeer deur die SAPD aan spesiale operasies in die Wes-Kaap.

Maroela Media het vroeër berig Ian Cameron, woordvoerder van die drukgroep Action Society, het gesê die Wes-Kaap het al jare lank die grootste hoeveelheid vakante poste in die polisie in vergelyking met ander provinsies. ʼn Verslag deur die Staatsdienskommissie wat in 2018 gepubliseer is, het bevind dat 85% van polisiestasies in die Wes-Kaap nie voldoende beman word nie. ʼn Jaar later, in 2019, het die Wes-Kaap nie voldoen aan die Verenigde Nasies se aanbeveling van 1:200 nie. Suid-Afrika se ratio is 1:383.

“Ons wil nie hê polisiëring en wetstoepassing moet deurlopend deur die ANC misbruik word nie,” het Cameron bygevoeg. “Action Society glo die ANC probeer doelbewus seker maak dat die polisie in die Wes-Kaap nie voldoende hulpbronne het nie, sodat Wes-Kaapse inwoners kwaad kan word vir die provinsiale regering. Meeste mense besef nie dat polisiëring onder die nasionale regering val nie. Ons weet dat die bestuur in die Wes-Kaap baie beter is as die res van die land. ʼn Federale stelsel sal help om seker te maak dat die geld vir polisiëring daarvoor aangewend word en nie op enige ander manier misbruik word nie.”