Cele op terme geplaas oor dreigemente aan besighede

Bheki Cele. Foto: Jairus Mmutle/GCIS

Polisieminister Bheki Cele moet sy onregmatige instruksies aan lede van die SAPD, dat hulle besighede mag penaliseer en sluit, terugtrek. Sakeliga se regsverteenwoordigers het Cele ingelig dat Sakeliga die reg voorbehou om ʼn dringende interdik teen hom te bring sou die SAPD volgens sy onregmatige instruksies handel.

Piet le Roux, uitvoerende hoof van Sakeliga, sê lede van die SAPD kan nie regter en jurie wees nie. “Hulle het nie die reg om, op die wyse wat Cele beskryf, boetes uit te reik of besighede te sluit nie – nóg konstitusioneel, nóg ingevolge die rampbestuurswet. Sou hulle dit doen, sal hulle onwettig optree, self vatbaar wees vir vervolging, en die staat (en dus belastingbetalers) aan skadevergoedingseise blootstel.”

Cele se openbare opmerkings, onregmatig soos dit is, eggo uitsprake deur pres. Cyril Ramaphosa dat kriminele vervolging op die kaarte is vir eienaars en bestuurders van ondernemings en persele, op grond van die nakoming al dan nie van hul werknemers en besoekers.

Le Roux sê die staat “se poging om nakoming van sy dikwels irrasionele en onkonstitusionele regulasies – soos in meerdere hofsake nou al bevind – die plig van ander mense te maak is onaanvaarbaar”. “Eienaars en bestuurders behoort nie met kriminele vervolging gedreig te word vir die optrede van andere nie, in besonder nie wanneer die optrede nie eens vir daardie persone self krimineel geag word nie. Ons word deur ons regspan geadviseer dat suksesvolle kriminele vervolging in hierdie verband onwaarskynlik is, maar steeds risiko’s daarstel,” het hy bygevoeg.

Sakeliga se regspan moniteer die gevaar van kriminele stappe teen besighede. “Ons moedig sakelui aan om enige pogings in hierdie verband onder ons aandag te bring.”

Klik hier om die brief aan Cele te sien.

Regte misdaad en groter gevare

Le Roux versoek die publiek om die SAPD te help om sy beperkte hulpbronne aan regte misdaad te wy en om nie lede van die SAPD by kleinighede te betrek nie.

“Ek versoek lede van die publiek wat Covid-19-verwante optrede deur eienaars en bestuurders van ondernemings onbevredigend vind om sulke gevalle direk by besighede aan te meld. In ʼn land waar moorde alleen 22 000 ʼn jaar beloop en waar pogings tot moord, seksuele aanslae, roof, aanranding, grootskaalse korrupsie en ander ernstige misdade veelvoude daarvan beloop, moet polisie die geleentheid gegun word om op regte misdaad te fokus,” het hy gesê.

“Suid-Afrika word tans blootgestel aan veel groter gevare as Covid-19, insluitende bedreigings van lewe en lewensgehalte danksy maatskaplike, politieke en ekonomiese onstabiliteit. Die gevolge wat opbou sluit in meer misdaad uit toenemende desperaatheid, politieke radikalisme, fiskale krisisse, onderwysmislukkings, lewensverlies as gevolg van laer lewenstandaarde en swakker mediese sorg, en veel meer.”

Strandsluitings

Intussen hou Sakeliga kontak met en verleen ondersteuning aan verskeie belanghebbendes langs die Tuinroete en ander sogenaamde brandpunte om so ver as moontlik skadelike, teenproduktiewe en onredelike regulasies soos strandsluitings teen te gaan. Le Roux sê dit is ʼn “deurlopende proses, wat belemmer word deur die tydsraamwerke ter sprake en die wyse waarop die regering die regulasies ontwerp om litigasie te bemoeilik”.

“Die nasionale regering se strandsluitings is skadelik en kos die regering die ondersteuning van die publiek en van besigheid. Dit is vernietigend vir die ekonomie in geraakte gebiede, wat op enkele weke ʼn jaar vir lewensvatbaarheid staatmaak.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

28 Kommentare

jongste oudste gewildste
JohanR

Watter boom het die ou uitgeval?

Kokerboom

Welgedaan Sakeliga. Die kaders kan NIE maak en breek soos hul lusvoel!

Anel

Hy is die grootste krimineel en nou kom hou hy homself hoogheilig. Pleks bepaal hy hom by REGTE misdaad maar ek dink nie hy weet wat dit is nie. Die ergste is dat hy as kommissaris afgedank is en toe na minister bevorder is. Dit is iets wat nog nie vir my sin maak nie.

Adrian

Seuntjie met sy standerd ses het nou die mag om ‘n besigheid te sluit…!??Skielik is “Sherriff” weer wakker want hier is nou weer ‘n “soft job” soos met die roker “misdadigers”…

Stephen

SA lankal n Polisiestaat.