Centurion-leerders ernstig beseer in botsing

Kylan Kunzmann. Foto: Facebook

Twee leerders van Hoërskool Zwartkop is in ʼn ernstige toestand in die hospitaal nadat hulle laat Vrydagaand in botsing op die Ou Johannesburg-pad betrokke was.

Antonio Hechter en Kylan Kunzmann was saam op ʼn motorfiets toe hulle gebots het met ʼn motor wat glo ʼn U-draai in die middel van die pad gemaak het. Albei kinders is van die motorfiets af geslinger.

Antonio is tans in matriek en Kylan in gr. 10 in Hoërskool Zwartkop.

Berna Seddon, ʼn Hoërskool Zwartkop-ouer wat as woordvoerder vir Antonio se familie optree, sê aan Maroela Media twee ander leerders was op motorfietse agter Hechter en Kunzmann, maar kon daarin slaag om die ongeluk te vermy. “Een van hulle het vertel Kylan het sommer meters ver deur die lug getrek. Sy was nog op die toneel by haar bewussyn, maar Antonio was bewusteloos,” sê Seddon.

Dit is nie bekend of die bestuurder van die motor beseer is nie.

Volgens ‘n vriendin van Antonio en Kylan wat die ongeluk sien gebeur het, het die botsing net na 22:00 plaasgevind.

Volgens Seddon is Kylan se bekken op twee plekke gekraak en is sy in die waakeenheid van ʼn private hospitaal opgeneem. Sy is Saterdagaand na die hoërsorgeenheid oorgeplaas.

Antonio het egter nie ʼn mediese fonds nie en is gevolglik in die Kalafong-staatshospitaal in Atteridgeville opgeneem. Volgens Seddon is al twee sy arms gebreek, ribbebene gebreek en het hy erge skade aan een been opgedoen. “Die dokters is baie bekommerd oor sy been in dié stadium,” sê Seddon.

Antonio Hechter. Foto: Facebook

Sy sê teen Saterdagaand was Antonio steeds in die noodgevalle-afdeling van die hospitaal.

Seddon het intussen ʼn fondsinsameling van stapel gestuur om Antonio se ouers te ondersteun en Antonio se mediese onkoste, veral nasorg-koste, te dek.

“Ons wil hom nie noodwendig na ʼn private hospitaal laat oorplaas nie, maar selfs in ʼn staatshospitaal is daar steeds koste wat gedek moet word. Sy ouers moet elke dag heen en weer ry hospitaal toe, daar is fakture wat betaal moet word en my bekommernis is veral oor Antonio se herstelproses wanneer hy uit die hospitaal ontslaan word. Enige terapie of ander behandeling wat hy sal moet kry gaan betaal moet word,” sê Seddon.

Sy sê dit is moeilik om te beraam hoeveel dié onkoste sal beloop, maar sy hoop om minstens R30 000 in te samel om die Hechter-gesin mee by te staan.

Enige persoon wat tot die fondsinsameling kan bydra, word versoek om Seddon te kontak by 079 492 2916 of [email protected].

[Red] Hierdie berig is aangepas sedert dit aanvanklik gepubliseer is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

52 Kommentare

jongste oudste gewildste
Sanet

Ons het agter hulle gery en dit was 11uur di aand.

Chris Ws

Mag hul albei spoedig en volkome herstel.Ek hoop die Mini word afgeskryf.Daar moet dadelik met ‘n derde party eis begin word vir albei beseerdes.

Ezzi

Die onverskillige bestuurder wat 1 uur in die oggend n u-draai gemaak het moet finansieel aanspreeklik gehou word vir alle kostes, al beteken dit hy/sy verloor hul motor en huis! Hierdie kinders kon hul lewens verloor en ouers hul kinders verloor het a.g.v. hierdie person se roekeloosheid.

Marinda

Sterkte aan die kinders, asook met die vonds in sameling vir Antonio se versorging. Moenie moed verloor nie. Bly positief. Where there’s a will, there’s a way.

Marius

Ek self motorfiets ryer het al geleer om te PROBEER om ten ALLE tye oplettend te wees van beweging van voertuie spesifiek by aansluitings en voertuie geparkeer langs ryvlak alle stetkte aan die beseerdes weet nie hoe motorfiets ryers so gereeld onsigbaar is nie het ook al so amper tweede gekom