Die vragmotorbestuurder Amukelani Rikhotso, wat betrokke was in ʼn ongeluk in Maart waartydens die minister van staatsdiens en administrasie gesterf het, het Dinsdag weer in die Polokwane-landdroshof in Limpopo verskyn ná hy glo ʼn kameraman van die SAUK aangeval het.
“Die verdagte het glo die kameraman aangeval deur met sy vuis teen die kamera se lens te slaan,” het kol. Ronel Otto, woordvoerder van die polisie, gesê. “Die kameraman het gevolglik geringe beserings aan sy gesig opgedoen.”
Rikhotso (29) staan tereg op drie aanklagte van strafbare manslag en een aanklag dat hy onder die invloed van alkohol bestuur het. Hy is vrygelaat op borgtog van R5 000 vir sy beweerde betrokkenheid in die ongeluk.
Minister Collins Chabane en sy lyfwagte, sersante Lesiba Sekele en Lawrence Lentsoane is dood toe Rikhotso glo met sy vragmotor ʼn U-draai voor hul motor op die N1 tussen Mokopane en Polokwane gemaak het. Chabane en sy lyfwagte is op die toneel dood. Rikhotso is nie tydens die ongeluk beseer nie.
Die saak van strafbare manslag is uitgestel tot 25 September, het Otto gesê.
Lees alle vorige berigte oor Collins Chabane op Maroela Media.