Chaos breek weer uit in Pta-middestad

Stakende werkers steek vullis in Thabo Sehumestraat (voorheen Andriesstraat) in die Pretoriase middestad aan die brand. (Foto: Msiza Jv/Twitter)

Nadat sake in die Pretoriase middestad Woensdagoggend grootliks vlot verloop het, het ontevrede werkers van die Suid-Afrikaanse munisipale werkersvakbond (Samwu) ʼn ruk gelede wéér die strate ingevaar.

Die middestad is Maandag en Dinsdag tot stilstand gebring deur die onwettige stakers wat ʼn loonverhoging van 18% eis. Hulle het vullisdromme uitgegooi, stokke rondgeswaai en munisipale voertuie soos busse en vragmotors onwettig gebruik om strate mee te versper.

Die Tshwane-metroraad het reeds ʼn dringende hofbevel gekry wat die werkers verbied om te staak, maar dit het klaarblyklik nié as afskrikmiddel gedien nie.

Die loongeskil is na die plaaslikeregeringsbedingingsraad verwys en het aanvanklik tot vanoggend se tydelike vrede gelei. Hoewel onderhandelings na verwagting vandag plaasvind, het die stakers die rus in die middestad nou weer onderbreek.

Minibustaxi’s moes by versperde kruisings omdraai en alternatiewe roetes soek terwyl talle winkels hul deure gesluit het voor die aankomende skare. Die stad se A Re Yeng- en Tshwane-busdienste is vroeër al opgeskort.

Mogola Taunyuane, woordvoerder van die burgemeester, het bevestig dat die kwessie na die bedingingsraad verwys is. Hy het terselfdertyd na die stakers gekap.

Rommel besaai die strate van die Pretoriase middestad. (Foto: Msiza Jv/Twitter)

“Die staking ondermyn die oppergesag van die wet, veral nadat die stad ʼn hofbevel teen hulle optrede bekom het,” het Taunyane gesê.

Samwu se streeksekretaris, Mpho Tladinyane, het gesê ʼn vergadering tot in diep in die nag tussen Samwu en die metroraad het op ʼn dooiepunt uitgeloop en die vakbond sien daarna uit om sy saak by die bedingingsraad te gaan stel.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

39 Kommentare

jongste oudste gewildste
Schalk

Hier is nog ‘n Oortyd geleentheid wat wink om reg te stel wat onwettig veroorsaak is. Jammer ANC die rekeining is op julle. Al julle beloftes haal julle in. ‘n Beter lewe vir almal?

Bert

Natuurlik sal ‘n dringende hofbevel niks uitrig nie want niemand gaan iets oorkom nie, kan maak nes hulle lusvoel, geen gevolge nie.

Peet

Staan ‘n oomblik stil en luister – dis die geluid van beleggings wat die land verlaat. Mense met beleggings is nie stupid nie.

TLC

Ek wonder wie skrik wie af
Ek kan dit nie meer vat nie
Hul is die oormag en sapd is wragtag nie opgewasse vir hul nie

James

Lyk vir my soos Zimbabwe doelwitte