Chaos by verhoor oor onteiening sonder vergoeding

Die openbare verhoor oor onteiening sonder vergoeding in Komani. Foto: ANA

Lewis Nzimande, voorsitter van die grondwetlike hersieningskomitee oor grondonteiening sonder vergoeding, het Woensdag gevra vir kalmte nadat die openbare verhoor in Komani (Queenstown) op ʼn chaotiese wyse afgeloop het.

Die verhoor wat in die Queenstown-stadsaal gehou is, het ʼn groot aantal mense getrek. Die stadsaal was van hoek tot kant volgepak en nie almal kon in die saal inpas nie. Dit het daartoe gelei dat die verrigtinge ontwrig is deur lede van die publiek wat in EFF-klere geklee was en geweier het dat die verrigtinge begin.

Die mense het struggle-liedere gesing oor grond wat met geweld afgeneem word en ʼn groep wat in ANC-kleure geklee was, het later by hulle aangesluit.

Die ontwrigtinge het dwarsdeur die verrigtinge voortgeduur toe mense wat ten gunste van onteiening sonder vergoeding is, hard geskree het om mense wat teen die wysiging van die grondwet is se stemme uit te doof.

Pieter Prinsloo van die Enoch Gijima-boerevereniging. Foto: ANA

ANC- en EFF-ondersteuners het die openbare verhoor oorgeneem en het ʼn beroep op LP’s gedoen om die proses te bespoedig en gesê hulle is gereed om grond te beset.

Daar was ook duidelike skeptisisme oor die regering se vermoë om die proses suksesvol te laat verloop. Yanga Zicinga, ʼn man wat homself as ʼn ANC-lid voorgestel het, het gesê ʼn onafhanklike agentskap moet op die been gebring word om die verspreiding van grond te implementeer.

“Daar moet ʼn nasionale maatstaf wees van hoeveel hektaar grond elke persoon mag besit.”

Nog ʼn spreker, Phaphama Madubedube, het gesê die regering moet stedelike grond onteien wat geoormerk is om mense op te hef en moet die eienaarskap van grond aan tradisionele leiers oorlaat.

Ander het meer radikale sienings gehad. Siyambonga Booi het die openbare verhore gekritiseer en gesê die verhore word gehou om wit mense te paai. “Ons kan nie onderhandel met diewe nie. Hoekom moet die regering by wit mense smeek?” het Booi gesê.

Vuyolwethu Nqaba van Black First Land First het gesê slegs wit mense se eiendom moet onteien word sonder vergoeding en mense moet nie vir politieke partye stem totdat hulle grond gekry het nie.

Lewis Nzimande, voorsitter van die grondwetlike hersieningskomitee oor grondonteiening sonder vergoeding, en Mncedisi Filtane, ‘n komiteelid. Foto: ANA

Pieter Prinsloo van die Enoch Gijima-boerevereniging het in reaksie hierop gesê: “Wat gaan julle doen met die grond en hoe gaan julle eet as julle niks van boerdery af weet nie?” Mense in die saal het woedend op dié stelling gereageer.

Michael le Grange, nog ʼn boer, het gesê dit is tyd dat dialoog die mense in Suid-Afrika verenig. “Ek gaan nie sê artikel 25 moet gewysig word of nie gewysig word nie. Ek wil net hê ons moet saamwerk en hierdie ding maak werk,” het Le Grange gesê.

Nog openbare verhore sal vandag in die Orient-teater in Oos-Londen gehou word.

Nzimande het tydens ʼn pouse aan joernaliste gesê daar moet meer verdraagsaamheid wees vir almal se uiteenlopende sienings. “Ons doen ʼn beroep op die publiek om beleefd te wees teenoor mense met ander sienings. Ons sien dat politieke partye heelwat mobilisering van hul lede gedoen het, maar elke lid van die publiek moet ʼn geleentheid gegun word.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

48 Kommentare

jongste oudste gewildste
BoerKarl

Het jy gesien hoe sout ek die grond en brand alles af?

Corne

Goeie vraag van Pieter Prinsloo.
Gee vir hul grond.
Geen implemente, geen geld vir plant of ander beplanning, geen ondervinding dalk. Hoe gaan hul die mas opkom ? Nog steeds dan arm en sukkelend.
Daar moet na slimmer oplossings gekyk word en saamgewerk word.

Koos

Ek stem, ek het betaal vir my huis. Hulle gaan nie my eiendom net vat nie.

jankoos

Tipies afrikaners een lug sy mening en die ander een kruip …..??

humor

Geen vermoe tot selfs die geringste logika nie. Tipies Afrika trant. Kan daar enigsins verwag word dat die regering in die besluitnemingsproses meer omsigtelik hiermee sal omgaan? Veral as die eff hierin n bondgenoot is.