Chaos toe betogers brande op UK-kampus stig

Betogers op die kampus van die Universiteit Kaapstad Woensdag (5 Oktober 2016) nadat chaos Dinsdagaand op die kampus ontstaan het. Foto: Twitter via @UCTMSA

Betogers op die kampus van die Universiteit Kaapstad Woensdag (5 Oktober 2016) nadat chaos Dinsdagaand op die kampus ontstaan het. Foto: Twitter via @UCTMSA

Nadat akademiese bedrywighede Maandag op die kampus van die Universiteit van Kaapstad (UK) aanvanklik soos normaal voortgegaan het, het chaos weer Dinsdagaand op die kampus ontstaan toe betogende studente verskeie brande regoor die kampus gestig het.

Gerda Kruger, woordvoerder van die universiteit, het in ʼn verklaring gesê die geweld het begin toe studente weer probeer het om die Steve Biko Studentevakbondgebou te beset. Volgens Kruger het die betogende studente oor die afgelope twee weke die gebou onwettig beset. UK-personeel wat in die gebou werk, kon in hierdie tyd nie met hul werk voortgaan nie.

Die universiteit het nuwe slotte aan die deure van die gebou aangebring en private veiligheidsbeamptes is by die ingange na die gebou geplaas om te verhoed dat die studente dit weer beset. Dinsdag omstreeks 16:30 het ʼn groep studente weer by die gebou opgedaag, maar is verhoed om die gebou binne te gaan.

“Die groep betogers het buite die gebou saamgedrom en teen middernag het die groep tot meer as 200 mense gegroei,” het Kruger gesê. “Hulle het die veiligheidsbeamptes met klippe bestook en met stokke aangeval. Daarna het hulle die gebou bestorm en deure en vensters gebreek.”

Volgens Kruger het die veiligheidsbeamptes probeer om ʼn menseketting te vorm om die betogers weg te hou van die gebou af, maar twee studente het daarin geslaag om deur te breek en die gebou binne te storm. Buite die gebou het betogers talle petrolbomme gegooi wat ʼn brand in een van die parkeerareas veroorsaak het.

Betogers op die kampus van die Universiteit Kaapstad Woensdag (5 Oktober 2016) nadat chaos Dinsdagaand op die kampus ontstaan het. Foto: Twitter via @GerardRalphs

Betogers op die kampus van die Universiteit Kaapstad Woensdag (5 Oktober 2016) nadat chaos Dinsdagaand op die kampus ontstaan het. Foto: Twitter via @GerardRalphs

“Die betogers het amok gemaak op die kampus deur op verskeie plekke brande te stig. Veiligheidsbeamptes het probeer om die brande te blus en studente uitmekaar te jaag en een van die beamptes is in die proses beseer,” het Kruger gesê. “Die SAPD is om 01:00 ontbied en polisiebeamptes het probeer om die situasie in bedwang te bring. Een van die polisiebeamptes is beseer toe hy deur verskeie klippe getref is. Ses skokgranate is afgevuur.”

Sy het gesê teen 03:00 was daar nog een brand op die Jammie-plaza wat nog nie geblus was nie, maar al die ander brande was teen daardie tyd geblus. Die polisie is steeds op die kampus om die situasie te monitor.

“Die universiteit hoop en probeer om die situasie op die kampus terug te bring na normaal sodat die instansie vandag kan heropen.”

Die universiteit het Woensdagoggend op Twitter gesê alle biblioteke is gesluit tot verdere kennisgewing. Sommige lesings is ook gekanselleer weens die onrus op die kampus. Studente is gevra om die UK-webtuiste dop te hou vir verdere aankondigings.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

17 Kommentare

jongste oudste gewildste
Emmarentia

Sluit die universiteite heeltemal en doen slegs die aanlyn studies. Geen plekke meer om af te brand nie.

Jaques

Die “studente” is nie betogers nie, hulle is bleddie kriminele, hanteer hulle daarvolgens.

Verdere vraag, is die “studente” ooit studente of ingehuurdes.

Ek se weer, laat die 90% ‘n slag opstaan en optree vir hulle reg om te kan studeer, en die poliesie help om ontslae te raak van die 10% wat alles net wil he.

Cherokee

Watter rol speel wit studente in die terroristiese aanvalle op universiteite? Op die boonste foto sien ek ten minste een wit meisie.

Adeline

Barbaars! Dan word daar gewonder hoekom party niks het nie…..

Theresa B

Uitstekend gestel Jaques!! Hierdie verdomde snert moet jou end kry!!