Cheverné: Dokters se vrese bevestig

Cheverné Duvenhage (Foto: Facebook)

Cheverné Duvenhage, ʼn gr. 8-leerder van Hoërskool Driehoek wat net meer as twee weke gelede in die tragedie by dié skool ernstig beseer is, sal Maandag ʼn derde operasie aan haar maag ondergaan nadat sy nóg ʼn terugslag beleef het.

Elardus Duvenhage, Cheverné se pa, het Maandagoggend aan Maroela Media gesê sy het wel infeksie opgedoen soos dokters gevrees het ná die tweede maagoperasie.

Cheverné het sowat ʼn week gelede ʼn operasie aan haar maagwand ondergaan toe die eerste operasie nié so suksesvol soos verwag verloop het nie. “Haar maagwand is lyk my te dun om te heg en het weer geskeur. Dokters het nou ʼn maasstof ingesit en haar weer toegewerk,” het Elardus voorheen aan Maroela Media gesê.

Cheverné is verlede week fyn gemonitor vir enige teken van infeksie wat waarskynlik kan voorkom wanneer ʼn pasiënt ʼn tweede operasie moet ondergaan.

“Sy hét toe ʼn wondinfeksie opgedoen. ʼn Mens se maag het glo verskillende lae. Haar dokter sal vandag die boonste laag van haar maag weer oopmaak om die oorsprong van die infeksie op te spoor en dit skoon te maak,” het Elardus vanoggend gesê.

Hy vertel dat Cheverné se dokter haar wond ná vandag se operasie vir eers nié sal toewerk nie, maar oop los sodat hospitaalpersoneel die wond kan dophou.

Volgens Elardus het verpleegsters Sondag Cheverné se wond skoongemaak toe hulle ʼn rooierigheid om haar naeltjie opmerk. “Die dokter sê daar is ʼn kans van 90% dat dit slegs ʼn lokale infeksie is. Ons hoop en bid en glo dat dit maar net ʼn oppervlakkige infeksie is. Ons sal egter eers ná vandag se operasie weet. ”

Ondanks die infeksie gaan dit in die omstandighede goed met Cheverné. Toetse van haar buik en longe het bevestig dat sy wel stadig maar seker herstel. Sy kry ook tans ʼn reeks antibiotika om die infeksie onder beheer te hou. Haar infeksietelling het sedertdien afgeneem, vertel Elardus.

Cheverné is egter steeds onder verdowing en aan ʼn ventilator gekoppel in die waakeenheid van ʼn hospitaal in Alberton. “Sy is kriewelrig en beweeg te veel. Haar dokter wil haar so stil moontlik hou, veral met ʼn maagwond,” verduidelik hy.

Die 13-jarige se longe sukkel om op hul eie asem te haal en daarom is Cheverné steeds aan die ventilator gekoppel. “Hulle het die ventilator ʼn bietjie afgestel. Hulle begin haar darem al van die masjien speen. Sy het wel nog ʼn entjie om te gaan,” sê Elardus.

Hy vermoed dat Cheverné nog lank onder verdowing gehou sal word veral ná haar jongste terugslag.

“Dit is maar altyd moeilik om jou kind so te sien. Maar ons vertrou dat dokters die beste vir Cheverné doen. Verdowing is nou die beste.”

Elardus vertel dat Cheverné se geliefdes hulle gedurende haar tyd in die hospitaal al meer touwys gemaak het met die mediese terme en masjiene. “Ons weet nou hoe al die masjiene werk en hou haar hartklop en temperatuur dop. Dít lyk goed.”

Hy sê dat Cheverné ook weer kleur in haar gesig gekry het en rustig lyk. “Ons noem haar maar ons slapende skoonheid,” sê hy met ʼn glimlag.

Maroela Media het vroeër berig Cheverné is beseer toe ʼn loopbrug by haar skool op 1 Februarie ineengestort het. Die 13-jarige meisie is na ʼn hospitaal in Alberton gevlieg waar sy met inwendige beserings en ʼn gebreekte voet opgeneem is. Cheverné het onder meer bloeding in haar buik gehad nadat haar maagwand tydens die voorval geskeur het. Altesaam 20 cm van haar derm moes ook verwyder word en sy het vier breuke in die brug van haar linkervoet opgedoen.

Vier leerders van Hoërskool Driehoek het in die tragedie gesterf.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

28 Kommentare

jongste oudste gewildste
AI AI AI

Ai Sus, ons bid so baie vir jou!!! Stertke !!!

Anita

Ons bid dat Liewe Jesus sy hand oor jou hou en jou weer gesond sal maak. Baie sterkte aan die mamma,pappa en famielie. Julle is in ons gebede!

Penelope

Baie sterkte vir jou en jou hele familie. Ons hoop dat jy spoedig sal herstel.

Katie de Villiers

Sterkte Cherverné weet Jesus hou jou handjie styf was. Alles kan nou net goed gaan. Sterkte met die herstel pad. Baie liefde en geduld vir Mamma en Pappa.

Carina

Ons neem outoriteit in die Magtige Naam van Jesus oor jou hele liggaam en spreek LEWE en GENESING oor jou!! ??