Christopher Panayiotou, twee ander hoor hul lot

Christopher Panayiotou, Sinethemba Nenembe en Zolani Sibeko in die hof (26 Oktober 2017). Foto: Raahil Sain/ANA

Christopher Panayiotou, Sinethemba Nenembe en Zolani Sibeko, die mans wat skuldig bevind is in verband met die moord op Jayde Panayiotou op 21 April 2015, is Vrydag in die hooggeregshof in Port Elizabeth gevonnis.

Regter Dayalin Chetty het Panayiotou en Nenembe tot lewenslange tronkstraf gevonnis vir die moord op Jayde. Nenembe is tot ‘n bykomende 15 jaar tronkstraf gevonnis vir roof met verswarende omstandighede. Sibeko is tot 15 jaar tronkstraf gevonnis vir sameswering tot moord.

Christopher is op 2 November skuldig bevind aan die moord op sy vrou. Hy is ook skuldig bevind aan dwarsboming van die gereg. Nenembe, een van Panayiotou se medebeskuldigdes, is skuldig bevind op aanklag van moord, asook op ʼn aanklag van roof met verswarende omstandighede. Sibeko is skuldig bevind op ʼn aanklag van sameswering tot moord.

Christopher se suster, Kalleope, het Donderdag gepleit dat haar broer nie tot lewenslange tronkstraf gevonnis word nie. Sy het gesê hy is ‘n liefdevolle, omgee en medelydende persoon.

Jayde se suster, Tony Inggs, het vroeër ter strafverswaring getuig en gesê haar familie sal Christopher nooit vergewe nie. “Ek wil hê jy moet weet dat my ma, pa en ek jou nooit sal vergewe nie,” het ʼn emosionele Inggs gesê. “Die lafaards wat hier in die voorste ry sit sal nooit vergewe word nie.”

Jayde is op die oggend van 21 April 2015 buite die Stellen Glen-kompleks in Kabegapark ontvoer waar sy gestaan en wag het vir ʼn saamrygeleentheid werk toe. Haar liggaam is die volgende dag in ʼn “afgeleë gebied” naby die Kwanobuhle-township buite Uitenhage gevind. Sy is drie keer geskiet, twee keer in haar rug en een keer in haar kop.

Kapt. Gideon Olivier, ʼn ballistiese kenner, het tydens die verhoor getuig daar was ʼn ingangswond aan die linkerkant van Jayde se kop en ʼn uitgangswond aan die regterkant en “dit was definitief” die laaste skoot.

Jayde Panayiotou. Foto: Verskaf

Die staat het aangevoer Panayiotou was die meesterbrein agter sy vrou se moord en dat hy vir Luthando Siyoni betaal het om huurmoordenaars te kry om Jayde te vermoor. Volgens die staat het Nenembe vir Sizwe Vumazonke gehelp om die moord uit te voer. Sibeko het ook ʼn rol in die uitvoering van die moord gespeel.

Vumazonke is verlede jaar in aanhouding dood terwyl Siyoni ʼn getuie vir die staat geword het. Siyoni, ʼn artikel 204-getuie, gaan intussen ook moontlik vervolg word in verband met die moord op Jayde.

Die staat het aangevoer Panayiotou wou sy vrou laat vermoor omdat sy vir hom finansieel ʼn las was. Dit het ook ná Jayde se moord aan die lig gekom dat Panayiotou in ʼn buite-egtelike verhouding betrokke was met Chanelle Coutts wat as ʼn bestuurder by Panayiotou se OK Grocer gewerk het.

Coutts het tydens haar getuienis in die hof erken dat sy in ʼn buite-egtelike verhouding met Panayiotou betrokke was, maar het gesê sy het nie enige kennis gehad van die omstandighede wat tot Jayde se moord gelei het nie.

Een van die verdoemende bewyse teen Panayiotou was ʼn gesprek tussen hom en Siyoni wat tydens ʼn geheime polisieoperasie op video vasgevang is. In die video impliseer Panyiotou homself by sy vrou se moord deur herhaaldelik vir Siyoni te sê om hom nie te bel of te SMS nie omdat “hulle” sy oproepe dophou. Panayiotou vra ook vir Siyoni watter vrae die polisie aan hom gestel het en of daar gevra is of hy [Panayiotou] by die misdaad betrokke was.

Panayiotou sê in die video “hulle”, vermoedelik met verwysing na die huurmoordenaars, het nie Jayde se sakke en juweliersware gevat nie en nou lyk die moord soos ʼn “hit”. “So nou is hulle agter my aan en daarom kan ek jou nie net so voor mense sien nie, Thando,” sê hy.

Lees alle vorige berigte oor Christopher Panayiotou op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

28 Kommentare

jongste oudste gewildste
Barries

Uiteindelik, ‘n toepaslike vonnis.

Soos dit is

Hy is n ryk man wat sy vrou kon skei en kon aangaan met sy lewe. Hy het seker gedink dit gaan hom baie geld kos om te skei en daar is n goedkoper manier om van haar ontslae te raak. Dit wat hy gedoen het was brutaal en die angs wat sy moes beleef het in haar laaste oomblikke moes ondenkbaar gewees het. Ek hoop hy dink elke dag in die tronk daaraan.

kat

Mooi man- lekker in die tronk sit!!
Julle verdien dit!!! Julle gaan ou-mense daar uitkom – AS julle uitkom!!!!

Cdp

Dankie liewe Jesus

Sarel Strydom

Uiteindelik. Ook iemand way alles probeer om los te kom. Lewenslank is te kort. Binne 10 jaar uit op parool.