Drie busse is Sondag in Butterworth in die Oos-Kaap aan die brand gesteek.
“Die City to City-busbestuurders het by ʼn nabygeleë hotel geslaap toe die voorval omstreeks 01:00 plaasgevind het,” het kapt. Jackson Manatha, woordvoerder vir die polisie in die Oos-Kaap, gesê. ʼn Saak van opsetlike saakbeskadiging word ondersoek.
“Die polisie vermoed brandstigting. Die moontlikheid dat die brand weens elektriese probleme veroorsaak is, is reeds uitgeskakel,” het Manatha bygevoeg.
Die skade beloop ongeveer R4 miljoen.
Niemand is nog in verband met die voorval in hegtenis geneem nie.
