Clicks: Haarprodukte nou ook van dié winkelrakke verwyder

Argieffoto

Verskeie winkelgroepe het aangedui dat hulle nou óók TRESemmé-haarprodukte van hul winkels se rakke gaan verwyder in die lig van die herrie wat ʼn advertensie deur dié handelsmerk sedert die naweek ontketen het.

Woolworths, Pick n Pay en Shoprite het Woensdag aan Maroela Media bevestig dat hulle die besluit geneem het om nie meer TRESemmé-haarprodukte te verkoop nie.

“As ʼn maatskappy is ons diep bewus van ons verantwoordelikheid om rassevooroordele en -verskille te konfronteer wanneer dit geïdentifiseer word. Ons ondersteun nie die rassevooroordele wat in die TRESemmé-veldtog uitgespreek word nie,” het ʼn woordvoerder van Woolworths gesê.

Dié winkelgroep het besluit om verkope van TRESemmé-haarprodukte onmiddellik te staak.

“Gegewe die onlangse kommer oor die taal wat TRESemmé gebruik om hul produkreeks mee te adverteer, het ons besluit om die produkte van ons rakke te verwyder terwyl ons met die verskaffer in gesprek tree,” het Tamra Veley, woordvoerder van Pick n Pay, om haar beurt gesê.

(Foto: clicksgroup.co.za)

Dít volg kort nadat Clicks Dinsdag aangekondig het dat hy TRESemmé-haarprodukte van sy winkels se rakke gaan verwyder en eerder sy reeks plaaslike haarversorgingsprodukte gaan uitbrei.

Dié winkelgroep het die afgelope naweek in die sop beland nadat hy ʼn TRESemmé-advertensie op sy webwerf geplaas het waarin na verskillende vroue se verskillende haarsoorte verwys word. In die advertensie word die byskrifte “frizzy & dull” en “dry & damaged” gebruik by die foto’s van swart vroue se natuurlike hare, terwyl die byskrifte “fine & flat” en “normal” by foto’s van wit vroue se natuurlike hare gebruik word.

Verskeie Clicks-winkels is intussen deur ontstoke EFF-betogers beskadig.

Maroela Media het vroeër berig Marshall Dlamini, sekretaris-generaal van die EFF, het intussen ’n brief aan Alan Jope, uitvoerende hoof van Unilever, wat die TRESemmé-handelsmerk besit, gerig rakende die omstrede advertensie.

Luidens die brief het die advertensie woede veroorsaak aangesien die advertensie dit laat blyk dat wit mense se soort hare beter as dié van swart mense is.

Die EFF gee nou die maatskappy 24 uur om die kwessie rakende die advertensie op te klaar. Sou dit nie gebeur nie, sal die EFF beslissend optree, het Dlamini Woensdag gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

62 Kommentare

jongste oudste gewildste
Ameli

Klomp lafaards. Nou is al die ander winkels so bang en “jammer”. Passop net om nie te vergeet om asem te haal nie. “Slap jacks”

Adriaan

Waar sal ek TRESemmé produkte in die toekoms kan koop? Ek wil hulle graag ondersteun.

Trotse Boervrou

Ek wou julle al lankal vaarwel toeroep want julle is vrek duur. Hierdie knie-buig van julle maak dit dan nou vaarwel en nie tot weersiens nie.

Gerhard

Nou waar gaan ek nou my TRESemme’ shampoo en Conditioner koop? Mag ek dit nog gebruik? of word ek nou verplig om Black is Beautiful te gebruik.

annie

‘n Nuwe reeks haarbevogtigers is nou net op die mark geplaas voor die rooi pette se remme onklaar geraak het. In hierdie droè en droewige landstreek kon soiets dalk nuttig wees… maar nouja…