Clicks in Alberton gevandaliseer, aan die brand gesteek

Betogers het die Clicks in die Lemon Tree-winkelsentrum vandaliseer (Foto: Verskaf)

ʼn Winkelsentrum in Alberton in Gauteng was Maandagoggend genoop om sy deure te sluit nadat die Clicks-winkel in die sentrum aan die brand gesteek is. Die winkel is ook omtrent deur die betogers verwoes.

Volgens Eric Maloka, woordvoerder van die Ekurhuleni-nooddienste, het betogers vanoggend omstreeks 09:00 Clicks in die Lemon Tree-winkelsentrum betree en amok gemaak. Hulle het die winkel gevandaliseer en ook aan die brand gesteek.

Maloka sê Alberton en Thokoza se brandweer- en reddingsdiens is omstreeks 09:15 na die winkel ontbied nadat ʼn noodoproep van die winkelsentrum ontvang is.

“Met reddingswerkers se aankoms op die toneel, het hulle op die brand in die Clicks-winkel binne die winkelsentrum afgekom,” vertel Maloka.

Volgens die winkelbestuurder is die brand deur ongeveer 15 betogers veroorsaak.

Betogers het geweldadig toegang tot die winkel verkry deur hamers te gebruik om die winkel se deure oop te forseer. “Betogers het die winkel se rakke omgegooi en baie skade aangerig voordat hulle dit aan die brand gesteek het.”

Brand-en reddingsdienste is die oggend 09:15 na die Clicks ontbied (Foto: Verskaf)

Maloka sê daar was 12 werknemers in die winkel vasgekeer, wat ongedeerd van die voorval afgekom het.

Die brand is binne minute geblus en die swaar, digte rook is met ʼn suigwaaier onttrek.

Maloka het aan Maroela Media bevestig dat die winkelsentrum se bestuur gesê het dat die hele sentrum vir die dag gesluit word. Bedrywighede sal Dinsdag gewoonweg aangaan.

Die toneel is aan die polisie oorhandig vir verdere ondersoek.

Maroela Media het ʼn navraag aan die winkelsentrum se bestuur gestuur, maar wag nog vir terugvoer.

EFF-lede betoog van vroegoggend af by Clicks-winkels landwyd. Die kleinhandelaar het vroeër aangekondig dat sy winkels Maandag oop sal wees ondanks die EFF se dreigemente om sake by al die kleinhandelaar se takke tot stilstand te bring. Daar is intussen ook berigte dat talle Clicks-winkels wel gesluit is weens die betogings.

ʼn Rasseherrie het vroeër op sosialemediaplatforms losgebars oor ʼn Clicks-advertensie waarin na verskillende vroue se verskillende haarsoorte verwys word. In die advertensie word die byskrifte “frizzy & dull” en “dry & damaged” gebruik by die foto’s van swart vroue se natuurlike hare, terwyl die byskrifte “fine & flat” en “normal” by foto’s van wit vroue se hare gebruik word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

36 Kommentare

jongste oudste gewildste
Willem

Hoop die ander winkels wat nou ook skade lei dagvaar eff

Axel

Gee enige iets vir varke en jy kry dennings.
Wat van Lewies in die tronk DOOD GESLAAN IS DEUR ONS WONDERLIKE SAPS????????????????????????

DLR

Dink julle Malematjie sal oor die vingertjies getik word hiervoor. Ek wonder kan nie wag om te sien nie

Porseleintjie

Malema is mos in beheer. Knap gedaan.

Misky

Ek wil graag net sien of daar selfs 1 van die rooi pakke inhegtenis geneem is….. Nog elke mall of Clicks winkel wat ek ingaan het sekuriteit en waar is hulle vandag? Al die SAPD met hulle rubberkoels en waterkanonne, 73 000 SANDF lede wat ons belastingbetalers biljoene kos….. Waar is hulle vandag?