Clicks moet ook aan MRK, departement verduidelik

Vikesh Ramsunder.

Die Menseregtekommissie (MRK) het Vrydag met ʼn afvaardiging van Clicks vergader na aanleiding van die herrie oor sy beweerde rassistiese advertensie.

Die vergadering is deur die MRK versoek aangesien die Clicks-advertensie volgens die kommissie strydig is met die Wet op die Bevordering van Gelykheid en die Voorkoming van Onbillike Diskriminasie.

Volgens Gushwell Brooks, woordvoerder van die MRK, het Vikesh Ramsunder, uitvoerende hoof van Clicks, tydens die vergadering weer om verskoning gevra vir die voorval. “Hy het presies verduidelik hoe die advertensie, wat deur ʼn derde party geskep is, uiteindelik op Clicks se webwerf geplaas is en ook besonderhede gegee oor maatreëls wat ingestel sal word om ʼn herhaalde oortreding te voorkom.”

Daar is tydens die vergadering gesê dat alle Clicks-werknemers, en spesifiek die bestuur, transformasie-opleiding sal ondergaan. “Ramsunder het hom daartoe verbind om Clicks se verskaffers by sy transformasie-agenda te betrek in ʼn poging om te verseker dat geen ongevoelige advertensies in die toekoms geskep en geplaas word nie.”

Clicks het verder onderneem om alle interne dokumente oor transformasie beskikbaar te stel, asook die maatreëls wat die maatskappy vorentoe sal instel. Die MRK sal egter wel voortgaan om met Clicks in verbinding te bly. “Dit sluit in die hersiening van Clicks se huidige beleid wat handel oor diversiteit en inklusiwiteit, asook prosedures om te bepaal watter inhoud is grondwetlik voldoende.”

Minister Khumbudzo Ntshavheni. Foto: Flickr/GovernmentZA

Clicks het ook Donderdag met Khumbudzo Ntshavheni, minister van kleinsakeontwikkeling, en haar departement vergader.

Volgens die departement het Ramsunder tydens dié vergadering onderneem om besteding aan klein, mikro- en medium ondernemings te verhoog en plaaslike skoonheids- en haarversorgingshandelsname en ander produkte te ondersteun.

Ntshavheni het opgemerk dat Clicks se voorkeurverkrygingsbesteding op groot en gevestigde maatskappye fokus, maar nie volledig bemagtigde maatskappye insluit en bydra tot die bou van ʼn inklusiewe ekonomie nie.

Die minister het voorts gesê haar departement sal Clicks help om te fokus op ondernemings wat deur swart mense, vroue, die jeug en gestremde mense besit word.

Die departement en Clicks het ʼn werkspan in die lewe geroep om die inwerkingstellingsplan te finaliseer, asook die vordering op spesifieke fokusgebiede te monitor.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

30 Kommentare

jongste oudste gewildste
Kokerboom

Clicks is doelbewus totaal gekaap deur die ANC boewebende dmv afpersing. Terloops die bestaan van die Dept van Kleinsake(natuurlik swart alleenlik) is helemal onnodig en geldmors!!!

Marius

Pot snot

Pieter

‘n Naam soosVikesh Ramsunder klink vir my klaar baie getransformeer. Nou wonder ek hoeveel witmense by die advertensie betrokke was. Clicks is ook ‘n BEE maatskappy. Die hele gedoente word ‘n afpersingsaangeleentheid.

Sandra

Huh? Wat moet Clicks nog doen om jammer te se, wat hulle nie in die eerste plek moes gedoen het nie.

Johann

Welkom in die land van hand poppe en narre waar iemand se sellfbeeld afhang( of is dit nou opstaan) van ‘n feitelik waarneming van jou hare?