Cosatu hou Donderdag reusestaking

Argieffoto van ‘n Cosatu-betoging deur lede van Numsa.

Die vakbond Cosatu beplan om die land Donderdag tot stilstand te dwing met sy reusestaking teen lae loonverhogings.

Cosatu het Woensdag gesê die staking is daarop gemik om die regering en die private sektor te dwing om die ekonomiese gemors waarin die land hom bevind, op te los en die kwessies wat werkers in die algemeen raak, ernstig op te neem.

Die staking sal op die “internasionale dag vir billike werk” plaasvind.

“Ons sal Donderdag dringende optrede van beleidmakers in die regering en besluitnemers in die private sektor eis om aanvalle wat op werkers gerig is, te staak.

“Kollektiewe bedinging word blatant deur die staat sowel as die private sektor ondermyn.”

Die vakbond sal voorts eis dat begrotingbesnoeiings omgekeer word aangesien dit enorme gevolge op lone in die staatsdiens gehad het. Cosatu vra ook dat die verbrokkeling van die Kommissie vir Versoening, Bemiddeling en Arbitrasie (KVBA) omgekeer word en afleggings by staatsbeheerde ondernemings gestaak word.

“Ons sal ook ʼn beroep op die private sektor doen om sy beleggingstaking te laat vaar, wat veroorsaak het dat baie ondernemings geld opgaar of landuit neem, ten spyte van vrygewige aansporing om in die land te belê.”

Munisipale werkers het vanjaar ʼn verhoging van 3,5% gekry, terwyl staatsamptenare se salarisse met 1,5% gestyg het.

Maroela Media het vroeër berig dat die regering, verteenwoordig deur die departement van staatsdiens en administrasie, sy aanbod van dié lae verhoging versoet het deur amptenare ʼn maandelikse toelaag van R978 aan te bied. Die toelaag word beskou as soortgelyk aan ʼn bonus.

Die besluit het kritiek veroorsaak dat die regering nie geld vir armes het nie, maar kontantbonusse vir staatsamptenare kan bekostig.

ʼn Algehele ontevredenheid oor loonverhogings duur intussen voort.

Die vakbond Solidariteit het vanjaar ’n ooreenkoms met die Suid-Afrikaanse vereniging vir ingenieurs en smelterye (Saefa) gesluit wat verseker dat werkers in dié bedryf, wat jare lank nie verhogings ontvang het nie, dit voortaan sal kry.

Cosatu is egter van mening dat verhogings steeds te klein is.

Die vakbond het ook nie net ʼn beroep op sy sowat 1,8 miljoen lede gedoen om aan die staking deel te neem nie, maar het alle Suid-Afrikaners gevra om deel te neem.

Die polisievakbond Popcru het Woensdag aangedui dat hy Cosatu se nasionale staking steun en het ʼn beroep op sy lede gedoen om deel te neem indien hulle nie aan diens is nie.

“Werkers in die openbare sektor veg in die voorste linies in die stryd teen Covid-19, maar hulle toewyding, goeie werk en dapperheid word duidelik nie deur die regering waardeer nie.

“Die nasionale tesourie het ook ʼn aanslag op werkers gelei in pogings om hul swaar gewonne regte te ondermyn en lone te onderdruk,” sê Popcru.

Cosatu het Woensdag bevestig dat die staking wettig is en aan Covid-19-regulasies onderworpe sal wees.

“Ons versuim om standpunt in te neem en die belange van ons lede in die lig van hierdie ekonomiese wanbestuur te verdedig, verteenwoordig ʼn erger vorm van lafhartigheid wat ons later sal berou.”

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

46 Kommentare

jongste oudste gewildste
Leana

Ek werk in die privaat sektor en ons verhogings is die afgelope 2 jaar nie meer as wat hulle gekry het nie, wat maak hulle beter?

Robert

Wonderlike manier om die ekonomie aan die gang te hou – daar is nie pille nie.

Martie Smartie

Ja staak man, en plunder sommer ook. Dit sal mos als help. Besighede, beleggers en die buiteland sien dit. Maar moenie worry nie, staak net.

Kaptein67

As jy minder staak meneer, sal jy dalk tyd het om vir jou werkgewer te wys dat jy meer werd is.

Plaaskind

Genade, die meerderheid werkers deesdae so onbeskof en onbehulpsaam, weet nie hoekom hulle nog moeite doen om in die oggende werk toe te gaan as dit dan so groot straf is nie, maar geld wil hulle altyd meer hê.