Cosatu sê groeiende getal werkgewers betaal nie salarisse

Cosatu se hoofkantoor in Johannesburg. (Foto: Twitter)

Die vakverbond Cosatu sê al hoe meer werkgewers, in die private sektor en die staatsdiens, versuim om hulle werkers te betaal.

“Die neiging het sowat twee maande gelede in die veiligheidsbedryf begin, toe werkers nie betaal is nie. Die werkgewer voer aan die kliënt, wat in dié geval die regering is, het hom nie betaal nie. Ons voel dit is ʼn onbillike verskoning om werkers nie te betaal nie,” het Cosatu in ʼn verklaring gesê.

“Ons het onlangs verneem dat die Westvaal-hospitaal en die Tswaing- plaaslike munisipaliteit ook nie hulle werkers betaal het nie. Ons beskou dit as uitbuiting en ʼn skending van werkers se regte en doen ʼn beroep op werkgewers om mense betyds te betaal.”

Die Suid-Afrikaanse Munisipale Werkersvakbond (Samwu), ʼn filiaal van Cosatu, het verlede week gesê meer as 30 munisipaliteite landwyd het werkers ingelig dat hulle nie salarisse kan betaal nie. Werkers moes self sien kom klaar om uitgawes soos mediese fondse, begrafnispolisse en aftreefondse te probeer byhou.

Die vakbond sê hy het reeds met die nuwe minister van samewerkende regering en tradisionele sake, Nkosazana Dlamini-Zuma en haar adjunk, Parks Tau, vergader om die probleme wat munisipaliteite teister, te bespreek. Die regering was glo onbewus daarvan dat werkers nie betaal word nie.

In Gauteng het werkers van die Wes-Randse munisipaliteit buite die raadskantore betoog, nadat hulle salarisse verlede maand ook nie betaal is nie. Dié munisipaliteit, asook die Merafong- plaaslike munisipaliteit, was twee van die Gautengse rade wat onwettig miljoene rand se staatsgeld in die nou gewese VBS Bank belê het.

“Die versuim om hulle te betaal het ʼn uiters nadelige uitwerking op werkers, hulle gesinne en die ekonomie in die geheel, omdat hulle nie eers basiese items kan koop nie. Ons doen daarom ʼn beroep op alle werkgewers om te verseker hulle betaal werkers op die ooreengekome datum en staak dié praktyk,” het Samwu gesê.

Verlede week is berig dat Denel se sowat 3 700 werknemers weens kontantvloeiprobleme net 85% van hulle salarisse gaan ontvang. Daar is later ingegryp en die minister van openbare werke, Pravin Gordhan, het gesê werkers sal hulle volle salarisse betaal word nadat ʼn lener na vore gekom het.

Die beleërde openbare uitsaaier moes ook einde verlede maand sy werkers gerusstel dat hulle salarisse betaal gaan word te midde van bewerings dat die SAUK nie die geld daarvoor het nie.

Die minister van kommunikasie, Stella Ndabeni-Abrahams, het vroeër vanjaar die versekering gegee dat die regering nie gaan toelaat dat die SAUK in dieper finansiële moeilikheid beland nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

17 Kommentare

jongste oudste gewildste
John

… en wie in die private sektor? Net staats- en semi-staatsinstellings word genoem.

Lou

Die begin van algehele chaos en anargie in die staatsdiens en munisipaliteite.
Die begin van die einde van die ANC regering ??

Lourens

Pravin Gordan was nog nooit Minister van Openbare Werke nie.

Jimmy

No pay, no work…..

Afgedankte werker

Nou wat het Cosatu gedink? Dit gebeur as jy jouself in die voet skiet. Stakings, korrupsie, vakbonde, staatskaping en onbevoegde aptenare het die land waar hy is, moenie nou huil nie! Laat die vakbonde nou die werkers betaal wat aangese is om te staak en besighede en fabrieke bankrot laat word het!