Die 38-jarige man van Hilton in KwaZulu-Natal wat sowat twee weke gelede positief vir die nuwe koronavirus bekend as Covid-19 getoets het, sal binnekort uit ’n hospitaal ontslaan word. Dié man is as die eerste bevestigde geval in Suid-Afrika aangemeld.
Sihle Zikalala, premier van KwaZulu-Natal, het Woensdag in ’n onderhoud met eNCA gesê die man en sy vrou sterk goed aan en is in dié stadium bloot in ’n wagperiode voordat hulle uit ’n hospitaal ontslaan sal word. Die man se vrou het kort ná hom positief vir die virus getoets, nadat hulle saam met ’n groep mense in Italië vakansie gehou het. Die egpaar het die land op 1 Maart binnegekom.
Volgens Zikalala is dit ’n aanduiding dat Covid-19 nié ’n doodsvonnis is nie. “Dit wys net dat jy vinnig sal herstel mits jy na jouself omsien.”
Altesaam 116 bevestigde gevalle is teen Woensdagoggend in Suid-Afrika aangemeld. Baie van dié pasiënte het onlangs uit die buiteland na Suid-Afrika teruggekeer, terwyl die oordrag by ander gevalle plaaslik gebeur het.
Pres. Cyril Ramaphosa het Sondag ’n nasionale ramptoestand verklaar.
Dit is baie goeie nuus!
Daar is hoop!!! Hopelik word die ander 116 ook gou gesond, sodat ons die darem in SA onderbeheer kan hou.
Bly om goeie goed te lees.
Wow baie goeie positiewe nuus! Hoop dit gaan so met die ander 115 ook. Mens moet net hande was en vitamine doen, dan is jy gesort en as jy siek is, nie skaam wees, laat toets en laat jou behandel, veral met isolasie sodat jy dit nie verder aansteke nie.