Covid-19 eis gedugte speurder

Brig. Dick de Waal is Vrydag aan Covid-19 oorlede. (Foto: Dick de Waal/ Facebook)

Die gedugte speurder wat die berugte Griekwastad-moorde en nou ook die moord op die hoteleienaar in Pofadder ondersoek het, is Vrydag aan Covid-19 dood.

Brig. Dick de Waal was hoof van die Valke in Kimberley en is twee weke gelede in die hospitaal opgeneem nadat hy met Covid-19 gediagnoseer is. Hy het Vrydag die stryd teen dié siekte verloor.

De Waal het die afgelope 35 jaar in die Suid-Afrikaanse polisie gedien. Hy is vir die eerste keer werklik in die kollig geplaas met die ondersoek na die Griekwastad-moorde in 2012, toe die 15-jarige Don Steenkamp sy gesin wreed vermoor het op hul plaas buite dié Noord-Kaapse dorp. Die Suid-Afrikaanse Hollywood-akteur Arnold Vosloo het De Waal later in die film Griekwastad vertolk.

Sy vrou, genl.maj Henriette de Waal, dien tans as waarnemende polisiekommissaris van die Noord-Kaap.

Huldeblyke het die afgelope dae op De Waal se Facebook-blad ingestroom. “Ek is stomgeslaan deur die dood van Dick de Waal weens Covid-19.  … Hy was ʼn wonderlike mens wat ʼn groot verskil as polisieman gemaak het en sal ʼn groot leemte in sy gemeenskap laat. Ons het ʼn lang pad saamgeloop met die Griekwastad-saak en ek sal vir ewig dankbaar wees vir sy vriendskap,” het die voormalige joernalis en skrywer van die boek Die Griekwastad-moorde, Jacques Steenkamp, geskryf.

“Wat ʼn skok om te verneem van Dick de Waal se afsterwe. Ons innige simpatie aan sy vrou, kinders en familie. Dit was ʼn eer vir Jan Smit om saam met hom te kon werk,” skryf Tersia Smit.

Kol. Mashay Gamieldien, provinsiale woordvoerder van die polisie in die Noord-Kaap, het namens die polisie sy hartseer oor De Waal se afsterwe uitgespreek en medelye aan De Waal se gesin, in besonder aan sy vrou, betoon.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

16 Kommentare

SomeOne ·

sterkte aan vrou, kinders, familie en vriende sowel as kennisse, ek voel die seer ook

EnoughSaid ·

Simpatie. Maar is die opskrif reg bewoord…..mens word eers “ontslape” as jy dood is….

Rooikoos ·

Klink net nie reg dat ‘n ontslape speurder deur Covid gedood is nie. Hy was mos lewend voor dit?

Thom ·

Volgens die manne op MM met die oordadige borshare is dit mos maar net ‘n verkoue ,,, Jammer Henriette ! Polisie het ‘n puik man verloor .

Hendrik Marthinus ·

Dankie vir jou kommentaar Tom
Veral ons maroela lesers wat se die covid is n klug
En covid is n gewone griep
Die virus is iets verskriklik, as ons almal nie saam staan nie gaan covid nog Baie lank deel van ons lewens bly
As n Saps lid wat n kollega verloor het, Kan ek net se Baie sterkte Generaal met die afsterwe van U man
Ek weet ons word elke dag so sleg gese deur veral maroela media lesers, maar ons sal nie so laag daal om nie ons gemeenskappe te Dien nie
Baie sterkte

twaalfboor ·

MM. Dis nie maj. genl. De Waal nie maar Genl. Maj. De Waal.

Karlahari ·

Sover ek verstaan is SAPS lede nie op die voorkeur lys vir Covid 19 entstof nie.
Hoe verklaar mens dit?

Gert ·

Want hulle moet gesond bly om die staat se agenda deur te voer.

Hendrik Marthinus ·

Hoekom plaas julle nie my kommentaar nie Maroela Media
Ek lees getrou en volgens my was my kommentaar nie negatief nie
Ek gaan beslis ophou julle onderste Un, as ek lees watter kommentaar julle soms plaas wat regtig lelik is verstaan ek glad nie watter kriteria julle op werk nie

MakersMark ·

Groot verlies in ‘n wêreld wat mans met integriteit soos Dick nodig het. Alle simpatie aan Henriette en die kinders. Julle het ‘n goeie man en Pa afgestaan aan die dood deur ‘n verskriklike wrede siekte. Soos Thom sê daar is ‘n spul hier op MM wat dit afpraat asof dit ‘n grap is en meer behep het met hul eie inkomste as die beskerming van lewens in die samelewing en vir almal kwaad is wat die reëls gehoorsaam en boonop belaglike aanmerkings kwytraak. Intussen sterf pilare van ons samelewing omdat hul hul eie veiligheid opoffer om ander te beskerm. En dit word vergoedkoop deur ander se arrogansie en domastrantheid. Baie sterkte in in swaar tyd.

Tiptol ·

Interessant dat die meeste kommentaar geen gevoel het dat iemand sy lewe verloor het nie. Maak nie saak hoe dit gebeur het nie, daar is familie wat tans baie seer het.

Danie ·

Die laaste van die garde wat nog die betekenis ken van wet en orde is besig om ons vinnig te verlaat.

Johanna ·

Baie sterkte aan die Familie van n baie goeie Brigadier.
Rus in Vrede

Gert ·

Jammer oor sy afsterwe. Ek sal wel myself nie gou laat inent nie. Daar is net eenvoudig te veel alarms teenoor hierdie inenting van n mens gekweekte virus.

Di ·

Sjoe wat ‘n groot verlies vir die samelewing. Dankbaar vir al die wonderlike werk wat hierdie uitsonderlike man verrig het in sy tydperk in die polisie. Baie sterkte aan sy familie. Mag die Vader julle die innige krag gee om hierdie groot verlies in julle lewens te verwerk.

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.