‘Covid-19 gaan einde van ANC beteken’ – SAIRV

Pres. Cyril Ramaphosa. Foto: @KhuselaS/Twitter

“Die ANC gaan een van die slagoffers van die Covid-19-pandemie wees.”

Dr. Frans Cronjé, ’n scenariobeplanner en die uitvoerende hoof van die Suid-Afrikaanse Instituut vir Rasseverhoudinge (SAIRV), het Woensdag dié voorspelling gedurende ’n virtuele gesprek oor die ANC se politieke toekoms gemaak.

Cronjé verduidelik dat die SAIRV reeds voor die pandemie voorspel het dat ’n eksterne globale skok ’n politieke verandering in Suid-Afrika teweeg sou bring – dié lank verwagte skok blyk nou die nuwe koronavirus te wees.

“Ek glo daar kan met inagneming van die pandemie gesê word dat die ANC klaar verloor het. Hoewel die ANC se nederlaag vertraag kan word, is dit onvermydelik,” meen Cronjé.

Cronjé voorspel dat die regerende party so vroeg soos die verkiesing in 2024 of 2029 onttroon gaan word. Dit is egter nie duidelik wie dan aan bewind sal wees nie hoewel koalisies ’n moontlikheid is, verduidelik hy.

frans-cronje-irr

Dr. Frans Cronje van die Suid-Afrikaanse Instituut vir Rasseverhoudinge. Foto: Instituut van Rasseverhoudinge/Youtube.com

Volgens Cronjé het die ANC aanvanklik goed gevaar in die dekade nadat hy in 1994 aan bewind gekom het. Teen 2004 het die ANC se steun met 6% gegroei en werksgeleenthede het byna verdubbel. Al meer Suid-Afrikaners het in dié stadium maatskaplike toelae ontvang en dienslewering in die land was beter as wat aanvanklik verwag is.

Volgens die SAIRV het die wiele egter in 2007 begin afval. Teen 2012 het werksgeleenthede gestagneer en die land se skuldvlakke het verdubbel. ’n Toename in gewelddadige protesoptrede teen die regering is ook in dié tyd opgemerk.

Cronjé meen dat die ANC net aan bewind kan bly indien hy die sukses van daardie eerste dekade van sy bewind in Suid-Afrika kan herhaal. Veranderinge aan die regering se bestuurstrukture sal egter daarvoor aangebring moet word en die ANC sal moet hervorm, verduidelik hy.

Volgens Cronjé is die ANC egter nie daartoe in staat om te hervorm nie. “Waarom is daar geen hervorming nie? Omdat die hervormers nie in beheer is nie. Die hervormers binne die ANC het die minderheidsinvloed,” verduidelik hy.

Op die vraag of Cronjé pres. Cyril Ramaphosa as ’n hervormer beskou, antwoord hy dat Ramaphosa in baie opsigte anders as oudpres. Jacob Zuma is, aangesien hy ’n span kenners het wat die menings van Suid-Afrikaners beïnvloed. “Hulle skep ’n gevoel van hervorming.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

24 Kommentare

jongste oudste gewildste
JohanR

Asseblief tog kan dit nie al voor einde December 2020 gebeur nie? Sal dit nou nie ‘n lekker 2020 Xmas wees nie en ‘n wonderlike 2021 nuwe jaar! Hopelik by December 31ste 2020 sal ons kan drink, soe dan kan ons suip, en die ANC vaarwel roep soos hulle in die maanlig in verdwyn.

quartus

Ons kan net bid en bid dat dit spoedig sal gebeur..en vir iemand wat nie meer drink nie,,sal ek beslis n uitsondering maak.ons hou duimpies

Henk

Ag, as dit net nie die EFF of ‘n soortgelyke groepering is wat hulle vervang nie, mag ek, Heer, asb leef om dit te aanskou en te vier.

Werner

Die arme ou Dr glo nog politiek gaan die land regruk daar wag n verassing vir hom een van die dae sit ons in n komunustiese bedeling

Willem

Dit kan op vlak 3 gebeur dan is daar darnk om dit te vier. Gaan n groot dag wees