Covid-19: Ramaphosa keur vrylating van duisende gevangenes goed

Pres. Cyril Ramaphosa. Foto: GCIS

Pres. Cyril Ramaphosa het goedgekeur dat byna 19 000 gevangenes voortydig op parool vrygelaat word in ʼn poging om die verspreiding van die nuwe koronavirus in die land se korrektiewe sentrums hok te slaan.

Glynnis Breytenbach, voormalige staatsaanklaer en huidige DA-LP, meen egter dié besluit gaan tot ’n groter humanitêre krisis lei as wat die president hiermee probeer vermy.

Khusela Diko, Ramaphosa se woordvoerder, het Vrydag in ʼn verklaring gesê Ramaphosa het besluit om byna 19 000 van die 155 000 gevangenes wat tans in die land se tronke is, vry te laat. Dit in ʼn poging om ʼn plan te maak met die land se oorvol tronke te midde van die Covid-19-pandemie.

Teen Woensdag het die departement van korrektiewe dienste reeds 165 Covid-19-gevalle en twee sterftes in die land se tronke aangemeld; die getal sluit gevangenes en korrektiewe beamptes in.

Volgens Diko is die besluit geneem in antwoord op die Verenigde Nasies se beroep op lande om hul tronkbevolking te verminder sodat sosiale afstand in korrektiewe sentrums gehandhaaf kan word.

Diko verduidelik dat die gevangenes wat vrygelaat gaan word ʼn lae risiko inhou om weer die wet te oortree en reeds ʼn groot deel van hul vonnis uitgedien het. Luidens die verklaring sal gevangenes wat tot lewenslange tronkstraf gevonnis is vir ernstige misdade soos seksuele misdrywe, moord en poging tot moord, geslagsgebaseerde geweld en kindermishandeling nie in aanmerking gekom om vrygelaat te word nie.

Argieffoto

Maroela Media het vroeër berig ʼn e-pos aan aanklaers en landdroste verlede maand het versoek dat sowat 2 000 verhoorafwagtende gevangenes in Gauteng, onder wie dié wat van geweldsmisdade aangekla word, vrygelaat word. Dit sluit in sowat 750 gevangenes wat weens die aard en erns van hul beweerde oortredings nie vir borgtog in aanmerking gekom het nie en reeds langer as twee jaar verhoorafwagtend en in aanhouding is. Name van mense wat aangekla word van moord, verkragting en aanranding verskyn ook op dié lys.

Diko wys daarop dat diegene wat vrygelaat word op parool vrygelaat word. Hulle word dus nie kwytgeskeld nie en kan weer in hegtenis geneem word sou hulle hul paroolvoorwaardes verbreek.

Luidens die verklaring sal die vrylating van die gevangenes oor ’n tydperk van tien weke plaasvind. Dit sal begin sodra alle prosesse van die paroolraad gefinaliseer is en gevangenes alle toepaslike rehabilitasie- en voorvrylatingsprogramme bygewoon het.

Breytenbach glo egter nie dit gaan moontlik wees om soveel gevangenes suksesvol op parool vry te laat nie, aangesien baie van die gevangenes wat vrygelaat word nie gesinne of huise het om na terug te keer nie. Diegene wat wel ʼn heenkome het, kan moontlik terugkeer na ’n huis waar daar min of geen kos is nie.

Volgens Breytenbach is dit boonop onmoontlik om in die huidige ekonomiese omstandighede werk te kry. Dit is boonop selfs moeiliker vir dié met ’n kriminele rekord om werk te kry. Dié wat op parool vrygelaat word, kan dus maklik in die versoeking kom om weer in misdaad te verval.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

41 Kommentare

jongste oudste gewildste
Willem

Waar by watter kampe gaan hul vir 14 dae gehou word onder kwarantyn sonder om getoets te word

Jacobus

Hulle is slegs besig om die werkloosheids en voeding probleem te vererger. Wat voel hulle. Hulle kruip weg agter rekenaars in virtuele kantore. Dop in die hand, min gepla met die welstand in die land. Sies.

Fedup

This is a joke right? Since when does this government adhere to the un’s fairytales? There is a reason those one’s are jailed. Letting them lose with such a stupid example is mind blowing. This move is going to bite hard, cyril.

Anel

Goeie genade, wat het hy gerook? Wat dan van Janus Waslush? Nou gaan hier weer gemoor en aan gerand word vir ‘n vale. Waar gaan die spul bly en kos kry. Jammer hulle kan nie sommer almal op sy plade gaan aflaai nie. Dan maak hy dit sy probleem.

Burgermeester

Laat ek dit reg verstaan; net omdat 0.1% van die totale gevangenes in aanhouding positief getoets is vir Covid-19, word 19 000 (12.15%) gevangenes vrygelaat? Hoe gaan die 19000 gevangenes wat vroeg uitgelaat word hulle les leer om nie weer die wet te oortree nie?