Covid-19-statistieke: Byna kwart van alle toetse positief

In hierdie stadium is byna ‘n kwart van alle Covid-19-toetse positief. (Foto: Michele Spatari/AFP)

Talle Suid-Afrikaners, veral in Gauteng, wag om te hoor of pres. Cyril Ramaphosa strenger inperkingsmaatreëls gaan instel in ʼn poging om die derde vlaag Covid-19-infeksies te stuit. Teen Donderdagaand was daar egter geen aanduiding van wanneer en of die president die land sou toespreek nie.

Intussen het die Nasionale Instituut vir Oordraagbare Siekte (Nios) gesê nog 16 078 nuwe gevalle van die koronavirus is bevestig. Dit bring die algehele getal infeksies op 1 877 143 te staan.

Byna ʼn kwart (24,5%) van alle Covid-19-toetse wat in hierdie stadium gedoen word, is positief.

SektorToetse gedoen Nuwe toetse 
Privaat7 213 05956%36 99856%
Staat5 555 99344%28 63344%
Totaal12 769 052 65 631 

Daar is tans 141 910 aktiewe gevalle van Covid-19 in Suid-Afrika en tot dusver het 1 675 827 mense van die virus herstel.

Die meeste nuwe gevalle (59%) word steeds in Gauteng aangemeld.

ProvinsieNuwe gevalle op 24 Junie 2021Totale gevalle tot en met 24 Junie 2021
Oos-Kaap466204 175
Vrystaat552111 953
Gauteng9 521588 009
KwaZulu-Natal696349 301
Limpopo86771 691
Mpumalanga63090 716
Noordwes1 14389 980
Noord-Kaap29157 758
Wes-Kaap1 912313 560
Totaal16 0781 877 143

Maroela Media het vroeër berig David Makhura, Gautengse premier, het gister gevra dat “strenger, geteikende en gelokaliseerde” afsonderingsregulasies vir die volgende twee weke in die provinsie ingestel word.

Prof. Bruce Mellado, lid van die premier se advieskomitee oor Covid-19, het boonop gewaarsku dat Gauteng nog nie die kruin van die derde infeksiegolf bereik het nie – gegewe die feit dat die getal nuwe bevestigde Covid-19-gevalle wat nou in die provinsie aangemeld word, meer is as die hoogste getal daaglikse gevalle tydens die eerste én tweede vlaag van infeksie.

Volgens die Nios is nog 148 Covid-19-verwante sterftes ook landwyd bevestig. ʼn Bykomende 607 mense wat die virus opgedoen het, is in die voorafgaande 24 uur in hospitale opgeneem.

SektorOpnames tot dusverSterftes tot dusverTans opgeneem
Privaat140 54323 4377 100
Staat156 39937 1363 636
Totaal296 94260 60010 736

Altesame 115 016 inentings is sedert die vorige verslag gedoen. Meer as 3,7 miljoen het reeds vir die regering se inentingsprogram geregistreer en net meer as 2,5 miljoen mense is tot dusver teen Covid-19 geïmmuniseer.

Deel van: SA-nuus

Koronanuusbrief

Wil jy op hoogte bly van alle nuus oor Covid-19 op Maroela Media? Teken in op die nuusbrief.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

33 Kommentare

jongste oudste gewildste
Thom

Die regering en die balhoriges gaan indirek baie mense vermoor , nes trompie met sy ontkenning van die virus wat kamstig sou ” oorwaai “!

Tiptol

Meer inperkings gaan die land erger knou as die virus. Mense het klaar nie werk nie en ly honger. Besighede sukkel om te bestaan. Mense moet self verantwoordelik neem.

annie

Gaan mense wat entstof ontvang, laks raak en glo dat hulle nie siek kan word nie… maskers afhaal? Daar is mense wat na inenting covid opdoen en erg siek raak. Aanvanklik is gemeld dat die virus lank op materiale en apparaat klou. Niks word meer daaroor gesè nie. As mense nie dmv asemhaling deur maskers siek word nie en hul hande elke 5 min reinig, hoe versprei die virus dan so vinnig?

Manda

Soos ek werk toe ry vanoggend, is feitlik geen bus- of taxi vensters oop vir ventilasie nie. As mens bv van die karwagte vra waar hulle masjlkers is, is dit ‘n geval van ‘O, eish sorry’. Daar is nog BAIE mense daar buite wat dink Covid, watse Covid? Ons moet maar vasbyt en mekaar alles van die beste toewens, want dit is te laat vir streng regulasies.

Dirk Mostert

16,078 positiewe toetse waarvan net 607 in hospitale opgeneem is. ‘n Mikrogram goud per ton rots maak nie van die rots gouderts nie.