Teen Donderdagaand het Suid-Afrika altesame 1 649 977 nuwe gevalle van Covid-19 gehad nadat nog 4 424 nuwe gevalle van die koronavirus bevestig is.
Dr. Zweli Mkhize, minister van gesondheid, sê 93 bykomende sterftes is ook aangemeld. Hiervan was een in die Oos-Kaap, 17 in die Vrystaat, 42 in Gauteng, drie in KwaZulu-Natal, 15 in Limpopo en 15 in die Wes-Kaap. Geen sterftes is in Mpumalanga, die Noord-Kaap of Noordwes bevestig nie.
Die algehele sterftesyfer weens Covid-19 staan nou op 56 170.
Die herstelkoers staan tans op 93,8% nadat 1 548 092 van die virus herstel het.
Meer as 11,4 miljoen Covid-19-toetse is tot dusver vir Covid-19 gedoen, waarvan 43 442 in die voorafgaande 24 uur. Altesame 54% van toetse is in die private sektor gedoen.
Provinsie | Sterftes | Reeds herstel | Aktiewe gevalle |
Oos-Kaap | 11 657 | 185 045 | 760 |
Vrystaat | 4 280 | 87 755 | 7 482 |
Gauteng | 11 141 | 424 933 | 14 303 |
KwaZulu-Natal | 10 500 | 324 656 | 4 220 |
Limpopo | 2 430 | 62 035 | 621 |
Mpumalanga | 1 438 | 78 668 | 1 700 |
Noordwes | 1 889 | 67 039 | 5 778 |
Noord-Kaap | 1 046 | 40 329 | 7 671 |
Wes-Kaap | 11 789 | 277 632 | 3 180 |
Totaal | 56 170 | 1 548 092 | 45 715 |
Massa-inenting
Tot dusver is 479 768 mense ingevolge die regering se Sisonke-program met een dosis van die Johnson & Johnson-entstof ingeënt.
Diegene wat in fase 2 van die program die Pfizer-entstof ontvang het, staan op 348 436.
Die algehele syfer staan tans op 828 204.