Argieffoto bloot ter illustrasie. (Foto: Unsplash)
Net 7% van mense wat Saterdag vir Covid-19 getoets is, het positief getoets. Die koers waarteen mense vir die virus positief toets, het dus die afgelope week verder gedaal, met ʼn weeklikse gemiddeld van 7,7%.
Daar is 2 320 nuwe Covid-19-gevalle en ses nuwe sterftes as gevolg van die virus is aangeteken. Net 29 mense is Saterdag met Covid-19 in die hospitaal opgeneem.
Die meeste nuwe gevalle is weer eens in Gauteng (859) aangeteken, gevolg deur die Wes-Kaap (458) en KwaZulu-Natal (341). Die minste nuwe gevalle is in die Noord-Kaap (33) aangemeld.
| Provinsie | Nuwe gevalle |
| Oos-Kaap | 77 |
| Vrystaat | 129 |
| Gauteng | 859 |
| KwaZulu-Natal | 341 |
| Limpopo | 71 |
| Mpumalanga | 172 |
| Noordwes | 182 |
| Noord-Kaap | 33 |
| Wes-Kaap | 458 |
Die getal inentings wat daagliks toegedien word, daal steeds. Saterdag is 22 935 mense teen die virus ingeënt.
Momentum het Saterdag sy lede in kennis gestel dat dié instelling sy inentingsentrums reg oor die land gaan sluit weens die lae aanvraag na inentings.
