Suid-Afrika lui die nuwe jaar in met 18 000 nuwe bevestigde gevalle van die koronavirus.
Dr. Zweli Mkhize, minister van gesondheid, het Oujaarsaand gedurende ’n kersaansteekseremonie in KwaZulu-Natal gesê dit is die eerste keer sedert die uitbreek van die Covid-19-pandemie in Maart verlede jaar dat soveel nuwe gevalle in Suid-Afrika aangemeld is.
Altesaam 1 057 161 bevestigde gevalle Covid-19 is nou reeds sedert die begin van die pandemie in Suid-Afrika aangemeld. Altesaam 43 124 van dié pasiënte is gesondheidswerkers.
Altesaam 28 469 mense het in dié tydperk weens die virus gesterf.
“Honderde mense sterf elke dag. Ek is seker dat almal van ons teen die tyd iemand ken wat dood is aan Covid-19. Nog 436 Covid-19-verwante sterftes is net vandag aangemeld.”
Altesaam 879 671 pasiënte het egter reeds herstel. Die herstelkoers staan op 83%.
Mkhize het daarop gewys dat hoewel 55 000 toetse op Oujaarsdag uitgevoer is, die infeksiekoers steeds op 32,5% staan. “Dit dui daarop dat die virus vinniger versprei as wat ons dit kan opspoor.”
Die minister het verder gesê dat die tweede golf van die koronavirus soos voorspel erger is as die eerste virusgolf weens ’n skerp toename in die aantal aktiewe gevalle.
Al nege provinsies het die afgelope week ’n toename in infeksies onder gesondheidswerkers aangemeld. KwaZulu-Natal het egter die grootste toename (687) beleef.
“Elke keer wanneer ’n gesondheidswerker Covid-19 opdoen, verloor ons ʼn paar hande vir minstens tien dae wat ons in hierdie tyd bitter nodig het.
“Kom ons vier die gesondheidswerkers wat elke dag geseëvier het sodat ek en jy nog ’n dag tegemoet kan gaan en met nuwe hoop die toekoms kan ingaan. Kom ons bring hulde aan diegene wat weens Covid-19 gesterf het deur mekaar beter te beskerm,” het Mkhize gesê.
Só lyk Suid-Afrika se Covid-19-gevalle nou:
Sterftes en persone wat herstel het:
Provinsie | Sterftes | Herstel | Aktiewe gevalle |
Oos-Kaap | 7 316 | 157 216 | 6 155 |
Vrystaat | 2 168 | 54 988 | 5 514 |
Gauteng | 5 549 | 253 070 | 28 399 |
KwaZulu-Natal | 4 394 | 143 524 | 52 065 |
Limpopo | 592 | 19 837 | 4 647 |
Mpumalanga | 644 | 32 859 | 3 204 |
Noordwes | 577 | 34 659 | 4 949 |
Noord-Kaap | 390 | 23 071 | 1 853 |
Wes-Kaap | 6 839 | 160 447 | 42 235 |
Totaal | 28 469 | 879 671 | 149 021 |