DA bly oor vlak 1, kap regering oor entstof  

DA-leier John Steenhuisen. (Foto: Armand Hough/ANA)

Die DA het pres. Cyril Ramaphosa se aankondiging dat die land nie na ʼn strenger inperkingsvlak gaan terugkeer nie verwelkom.

“Dit wil voorkom asof lesse oor die ondoeltreffendheid en vernietigende effek van inperkings uiteindelik geleer is, al is dit nege maande te laat,” het John Steenhuisen, DA-leier, gesê.

Hy het Ramaphosa se beroep dat alle Suid-Afrikaners hul deel moet doen om die virus te bekamp, herhaal. Beduidende gedragsveranderinge is volgens hom steeds die beste wapen om nie net die verspreiding van infeksies te bekamp nie, maar ook om te voorkom dat ander mediese traumagevalle ons hospitale oorweldig.

“Landsburgers moet ʼn groter rol speel in hierdie poging om gedrag te verander, maar waar dit nie gebeur nie moet ons verhoogde wetstoepassing kry om toe te sien dat die wette en regulasies nie geminag word nie. Hierdie gedragsverandering moet ook geld vir sosiale byeenkomste gedurende hierdie vakansietyd.”

Steenhuisen sê hoewel die land op vlak 1 bly, wat binnenshuise byeenkomste van tot 250 mense moontlik maak, sal sulke groot byeenkomste uiters onverantwoordelik wees gegewe alles wat ons nou weet oor die verspreiding van die virus. “Getalle en noue kontak is belangriker as enigiets anders, dus moet dit ʼn vakansieseisoen met ʼn verskil wees. Mense moet enige sosiale kontak tot die minimum beperk, op ʼn klein skaal en buite waar moontlik.”

Rakende die Nelson Mandelabaai-metro wat as ʼn brandpunt geïdentifiseer is en aan strenger beperkings onderhewig sal wees, het Steenhuisen ʼn beroep op Ramaphosa gedoen om behoorlik in te gryp by die situasie deur te verseker dat die nodige gesondheidsorgkapasiteit beskikbaar gemaak word.

“Dit moet onder meer behels dat die kapasiteit by bestaande hospitale vir Covid-spesifieke gebruik verhoog word, asook die voorsiening van tydelike veldhospitale met die nodige personeel.”

Die regering moet ook alles in sy vermoë doen om te verseker dat Suid-Afrika toegang het tot dieselfde beskerming as die res van die wêreld. “Dit moes begin het deur ʼn plek aan die voorkant van die tou vir Covid-entstowwe te verseker. Ongelukkig het ons regering ʼn gemors daarvan gemaak deur die sperdatum vir die eerste betaling in die Covax-inentingsinisiatief te mis. Dit beteken dat ons nou weer in die ry moet val, en Suid-Afrikaners dalk nog langer sal moet wag voordat ons ʼn entstof kry.”

Steenhuisen meen dit is onaanvaarbaar en dat die regering die land ʼn gedetailleerde en eerlike verduideliking verskuldig is van wat presies verkeerd geloop het. “Dit is noodsaaklik dat die betaling dié week nog gemaak word sodat ons ons plek in die ry kan bespreek.”

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

36 Kommentare

jongste oudste gewildste
Die Wolf

Weet nie hoe om fondse van SAL te leen sonder die medewete van PG nie.

Jaco

AL wat die DA mee moet ophou, is dié alewige toets toets toets vir corona in die Wes-Kaap. Dit stoot die corona syfers net onnodig op. Corona syfers in die Wes-Kaap is die 2de hoogste in SA. Môre oormôre gebeur dieselfde én erger as met Nelson Mandelabaai. Die DA in die Wes-Kaap se edele pogings om die “ramp” van corona te beveg, speel eintlik reg in die ANC se duistere planne met die DA, die Wes-Kaap en met wit mense. Hou ook maar die volgende in gedagte: Die sterk sekondêre doel met inperking is om wit besighede te laat swaarkry… Lees meer »

Rentia

Oor iets waar daar groot waarskuwings is? Reg John, jy en Alan kan heel eerste in die publiek julle inentings neem.. as julle na 5 jaar nog niks makeer nie, en die nodige toetse ondergaan om dit te bewys, sal ek volg (ook in die openbaar) Met ‘n 95% + oorlewingskoers, is ek, as mediese dokter bereid om te wag.

Baardman

John Steenhuisen het mos geweet daars ‘n sperdatum, maar hy verkies om NA die tyd klippe te gooi. Waarom het hy nie VOOR die sperdatum alle moontlike platforms in die media gebruik om druk op die regering te sit om die geld te betaal nie. Swak leierskap volgens my. Wens ons opposisiepartye wil wegbeweeg van die taktiek om te wag tot daar fout gaan, en dan wil geraas maak.

Jaco

Almal is moeg van corona en moeg van inperking, maar nou dat ‘n entstof binnekort beskikbaar is, is daar weer besware daarteen? Iets maak nie sin nie.