DA eis ook dat Mandela teruggeroep word

Zindzi Mandela (Foto: Twitter)

Die DA het sy stem gevoeg by oproepe dat Zindzi Mandela, Suid-Afrika se ambassadeur in Denemarke, teruggeroep word.

Volgens die gedragskode mag ʼn ambassadeur geen siening kommunikeer sonder die uitdruklike toestemming van die minister van internasionale betrekkinge en samewerking nie, het Darren Bergman, LP en skaduminister van internasionale betrekkinge en samewerking, gesê.

“As ambassadeur word jou private sienings beperk deur die verpligting om die beste belang van Suid-Afrika te handhaaf en verder te bevorder. Daarom is die onlangse twiets van die amptelike Twitter-rekening van Suid-Afrika se ambassadeur in Denemarke óf deur die minister onderskryf óf in stryd met die gedragskode, wat ʼn grondige rede vir terugroep is.”

Mandela het haar onder meer uitgelaat oor grondhervorming en na wit mense verwys as lafaards en “stelende verkragter-afstammelinge” van Jan van Riebeeck.

Minister Naledi Pandor het gister aan eNCA gesê die departement het ʼn sosialemediabeleid waaraan alle ambassadeurs moet voldoen en dat haar departement sal ondersoek instel na Mandela se twiets.

“Wanneer ons dus vasgestel het of dit ʼn twiet van haar (Mandela) is, of dan wél haar opmerkings was, kan ons vasstel of die opmerkings in ooreenstemming met die sosialemediabeleid is,” het Pandor aan eNCA gesê.

Bergman het intussen ook gesê dit is erg kommerwekkend dat die departement vroeër aangevoer het dat hy Mandela nie in die hande kan kry nie omdat sy glo reis. “Dit is ʼn misdryf vir ʼn ambassadeur om die land van akkreditasie te verlaat sonder departementele goedkeuring en ʼn verdere oortreding om vir dae lank onbereikbaar te wees. Dit is gronde vir onmiddellike terugroep.”

Volgens Bergman het die DA dringende vrae aan minister Pandor gestuur om te hoor of Mandela se sienings ook die sienings van die Suid-Afrikaanse regering is.

Die DA erken dat die versoeningsprojek in Suid-Afrika oor die afgelope dekade tot stilstand gekom het, en volgens Bergman het dit tot gevolg dat baie burgers voel hulle het nie ʼn sê in demokratiese Suid-Afrika nie.

“Hierdie klimaat laat toe dat verdelende en skadelike politiek wortel skiet. Hierdie ‘ons vs. hulle’ mentaliteit verdeel ons en ondermyn die moeilike maar moontlike visie om een Suid-Afrika vir almal te bou.

“Ambassadeur Mandela se kommentaar op Twitter is jammer aangesien dit probeer om blaam te plaas op sekere dele van die bevolking vir die regering se totale mislukking om die ekonomie te laat groei en betekenisvolle regstelling te verkry.

“Die DA glo in alle Suid-Afrikaners se reg om grond en eiendom in eie reg te besit. Dit moet gekoppel word aan ʼn grondhervormingsbeleid wat die ongeregtighede van die verlede regstel.”

AfriForum en die VF het ook vroeër versoek dat Mandela teruggeroep word weens haar uitlatings.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

25 Kommentare

jongste oudste gewildste
piet piet

Goeie probeerslag maar weereens te laat om te wys dat julle regtig wou.

Leon

Ons het nie ‘n demokrasie nie.
Ek dog dit is die regering se beleid wat sy getwiet het. Dit is hoe die regering huidig optree, so hoe kan sy dan aan iets skuldig wees wat regerings beleid is?

Landi

Wat net so ongelooflik…jammer nee ek kan dit glo, swartes mag sê en doen net wat hulle wil maar as n blanke persoon net iets skeef sê van swartes, verloor ons ons werke, ons families en vriende word “getarget” en jy moet eerder landuit want jy kry nie weer n werk in SA nie. Maar hierdie mense mag sê en doen net wat hulle wil

Strand loper

Verskoon haar asb sy het haar verspreek en sukkel om technology onder die knie te kry en bedoel die teenoorgestelde.

John

… ongeregtighede van die verlede, DA? Ons moet die ANC-takke nou nommers begin gee, anders raak die spul verstrengel en ons te ingelig. Mmusi sal dalk ook dadelik oppak as hy as ‘n minister aangestel word… in die hoop om via die agterdeur die groot kamèra se ligte te vang… Die DA gaan so op eentjie die Kaap vir die ANC omkeer en teruggee.