DA en EFF raak handgemeen in parlement

Natasha Mazzone. (Foto: Skermskoot)

Spanning het Dinsdagmiddag in die parlement geheers toe lede van die DA en die EFF mekaar fisiek aan die keel wou gryp. Dit nadat ’n prominente EFF-LP glo rasgebaseerde opmerkings na parlementêre amptenary geslinger het.

Die hele gemors het begin toe die EFF-LP Naledi Chirwa in ’n ledeverklaring beweer het die minister van gesondheid, dr. Zweli Mkhize, en van sy vriende het onregmatig finansieel voordeel getrek uit die toeken van tenders wat met die bestryding van die koronavirus verband hou.

Die adjunkspeaker, Lechesa Tsenoli van die ANC, het die tafelpersoneel van die Nasionale Vergadering (dit is daardie amptenare wat in swart en wit geklee voor die speakerstoel sit) geraadpleeg en toe gesê Chirwa kan nie in die parlement potensieel lasterlike bewerings sonder meer stel as feit nie.

Op daardie oomblik (die amptenare roteer deurgaans) was albei die amptenare wat as tafelpersoneel die adjunkspeaker van raad bedien het, wit mense, en dit het Nazier Paulsen, EFF-LP van Bellville, laat rooi sien.

Hy het glo rasgebaseerde opmerkings oor die amptenary gemaak, wat verskeie DA-LP’s (wit, swart en bruin) die harnas ingejaag het.

EFF-LP Nazier Paulsen. Foto: Facebook

Woordewisselings het ontstaan, met Paulsen wat in kru taal aan die DA-hoofsweep, Natasha Mazzone, toegevoeg het dat sy moet teruggaan na Italië, en aan die DA-LP Phumzile van Damme dat sy moet terugkeer na Swaziland.

Op hierdie punt (terwyl Tsenoli sy bes probeer het om orde te handhaaf en die ANC verstom toegekyk het) het DA-LP’s en EFF-LP’s dreigend op mekaar afgestap met beledigings en dreigemente wat heen en weer geslinger is.

In ’n stadium het Mazzone haarself fisiek as buffer tussen die LP’s van die DA en die EFF geplaas om ’n fisieke konfrontasie te verhoed.

Die adjunkspeaker het vervolgens vir Paulsen uit die Nasionale Vergadering geskop, met Paulsen wat glo, volgens DA-bronne, vir Van Damme toegevoeg het: “Ek sal jou so hard op*** dat jy nie meer sal kan praat nie.”

’n Verwoede Van Damme het die adjunkspeaker ingevlieg oor sy onvermoë om orde te handhaaf. Toe skop hy haar sommer ook uit.

Toe Van Damme uitstap, het twee DA-LP’s, Kevin Mileham en Chris Hunsinger, saam met haar na buite gegaan, waar hulle vir Paulsen aangetref het.

Paulsen, wat na bewering baie aggressief was, is glo vervolgens deur die polisie onder bedwang gebring en van die parlementêre terrein af vergesel.

Daarna het die parlement se werksaamhede gladweg voortgegaan.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

46 Kommentare

jongste oudste gewildste
jacques

Boswell Wilkie is meer organised as hierdie narre saam…

Pierre

Erger as n kleuterskool

Persheks Adri

Soos gewoonlik sit die ANC “verstom” en kyk na wat aan gaan eish. Mens sal sweer hulle is kinders… EFF moet hulle plek begin ken pffft hulle maak net moeilikheid waar hulle gaan!

JohanR

Baie braaf in die parlement, maar sodra die skote, traan rook en bomme afgaan, dan sien jy net hoe die Economic Fleeing Fighters hol straat af!

Flip

Die ” wit haat” slaan nou oral uit