DA ignoreer bewerings van diefstal, sê Good

Tertius Simmers, LUR van menslike nedersettings in die Wes-Kaap (Foto: Courtney Africa/African News Agency/ANA)

Brett Herron, sekretaris-generaal van die Good-party, het Dinsdag die Demokratiese Alliansie daarvan beskuldig dat die party se leierskap bewyse ignoreer dat die Wes-Kaapse LUR van menslike nedersettings, Tertius Simmers, beskuldig is van elektrisiteitsdiefstal voor hy in die amp aangestel is.

“DA-leiers het geweet die LUR is beskuldig van elektrisiteitsdiefstal, maar het hom nietemin bevorder. Die party het dissiplinêre prosesse opgeskort hangende die polisieondersoek, terwyl die munisipaliteit verhoed word om strafregtelike klagte vir elektrisiteitsdiefstal te ondersoek,” het Herron in ʼn verklaring gesê.

“Good wag op die Wes-Kaapse premier, Alan Winde, se reaksie op fluitjieblasers se bewyse dat Simmers skuldig is aan elektrisiteitsdiefstal toe hy as ʼn DA-raadslid in George gedien het. Verdoemende getuienis as bewyse dat dit onder die mat ingevee is, het aan die lig gekom.”

Simmers verwerp die beskuldiging en wys daarop dat die saak ten volle ondersoek is in 2016 en dat hy onskuldig is. “Ek het nie aan die elektrisiteitsmeter gepeuter nie. Ek het die peutery by George-munisipaliteit aangemeld. Ons weet vandag nog nie wie die boete betaal het nie. Dit is nie ʼn verrassing nie dat dié saak aan die lig kom, net ʼn paar weke ná die Good-party ʼn tussenverkiesing in George verloor het,” het Simmers gesê.

“Patricia de Lille, leier van die Good-party, het ook in die verlede na dié bewerings verwys, toe sy nog ʼn lid was van die Demokratiese Alliansie, en nou wil Brett Herron dit weer oopmaak. Dit is duidelik kwaadwillig van mnr. Herron en ek sal regsadvies bekom,” het Simmers aan die African News Agency gesê.