DA meen nuwe Prasa-hoof is onbevoeg

Argieffoto

Die Demokratiese Alliansie het Dinsdag gesê Sibusiso Sithole is nie bevoeg om die Passasierspooragentskap van Suid-Afrika (Prasa) reg te ruk nie.

Maroela Media het vroeër berig Prasa het aangekondig Sibusiso Sithole is die agentskap se nuwe uitvoerende hoof vir ʼn tydperk van 12 maande. Die 12 maande is geldig vanaf 1 Junie 2018. Sithole was voorheen die stadsbestuurder van die eThekwini-munisipaliteit (Durban) en neem die leisels oor by Cromet Molepo, wat sedert Desember 2017 in dié posisie waarneem.

Volgens Prasa is Sithole, ʼn ommeswaai-strateeg en beleidspesialis, aangestel om stabiliteit en sekerheid na Prasa te bring.

Manny de Freitas, woordvoerder van die DA, het egter gesê die minister van vervoer, Blade Nzimande, het, met Sithole se aanstelling, Prasa se herlewing en omkeerstrategie gekortwiek nog voor dit begin het, en verwys na Sithole se “twyfelagtige verlede en beperkte kennis van die vervoerbedryf”.

“Die DA het herhaaldelik versoek dat die aanstellingsproses vir hoofde van staatsinstansies hersien moet word, aangesien die huidige stelsel, waar die ministers hul eie diskresie gebruik, nie aanspreeklikheid inhou vir die aanstelling van ampsdraers nie,” het De Freitas gesê. “Dit is eenvoudig onaanvaarbaar dat die minister dit goeddink om ʼn individu, wat nie eens sy eie finansies kan bestuur nie, aan te stel by ʼn organisasie soos Prasa, wat gebuk gaan onder slegte skuld en wanbestuur.”

De Freitas het gesê Sithole het self ongeveer R2 miljoen in slegte skuld, het versuim om sy inkomstebelasting te betaal en was traag om op te tree teen maatskappye wat by tenderbedrog betrokke was toe hy die stadsbestuurder van eThekwini was.

“Mnr. Sithole se versuim om doeltreffend die sake van die stad van eThekwini te bedryf, laat die vraag ontstaan of hy bekwaam is om Prasa se probleme te hanteer.”

Prasa het Dinsdag weer versuim om hul jaarlikse verslag in die parlement in te dien, wat al sedert Augustus verlede jaar uitstaande is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

11 Kommentare

jongste oudste gewildste
Stompie van As

Kan seker weer n paar hofaansoeke van DA verwag.

Ray

Ek betwyfel al op die stadium die bevoegdheid van die DA om hulle eie interne probleme op te los. Miskien moet hulle daarop fokus. Dan kan hulle weer professionele opinies gee

lewies

Die DA is moedeloos geveg teen die gewetenloses wat geen integriteit openbaar nie

Louis le Royx

Hy en sy gabbas het die Ethikweni munisipaliteit in die grobd in bestuur, nou word daar vir hom dankie gesê.

Koos de Meyer.

Wie is regtig bevoeg. Geld wat stom is maak reguit wat kom is. Die geld val mos uit die lug. Ons kyk mos maar na mekaar. Bevoeg of onbevoeg, die belasting betaler sorg mos so wat gee hulle om. Onbevoeg, korub, en wat nie nog alles nie. Ons gaan net meer en meer in die afgrond in.