DA neem ANC-wyk af

Argieffoto: Twitter via @Our_DA

Die vreugdevure brand hoog in die Wes-Kaapse DA nadat die party vir die eerste keer ʼn spesifiek hardnekkige ANC-wyk in die suide van die provinsie kon inpalm en in die proses alleenbeheer oor die Hessequa-munisipaliteit op Riversdal kon oorneem.

Hessequa wyk 4 is die gebied van Slangrivier tot op Witsand, en was sedert 1994 nog altyd ʼn ANC-wyk. Gerald Boezak (DA) het sy party se steun egter met 23 persent vermeerder en die wyk met 1 404 stemme gewen teenoor 1 015 vir die ANC, 75 en 34 stemme onderskeidelik vir twee onafhanklike kandidate en 28 stemme vir die VF Plus.

Stellenbosch het sy reputasie as sterkste DA-munisipaliteit in die land gestand gedoen toe Zelda Dalling (DA) wyk 9 (die gebied om die universiteit) met 379 stemme teen vyf vir die ANC gewen het. Dit verteenwoordig ʼn swaai van twee persentasiepunte na die DA vergeleke met 2016.

Minder goeie nuus vir die Wes-Kaapse DA het gekom uit George – ʼn dorp waar die party baie interne struweling ondervind. Wyk 18 is dele van die woonbuurte Denneoord, Denver Park en Genevafontein en hoewel Donovan Gulting (DA) die wyk gemaklik verower het met 953 stemme, het die party se steun met 21 persentasiepunte geval.

Die VF Plus was tweede met 221 stemme, gevolg deur die ACDP met 103, die EFF met drie stemme en die ANC met twee.

In die Noord-Kaap het die DA Kimberley se wyk 28 (die oorwegend bruin woonbuurt Colville) redelik gemaklik behou, hoewel die party met ses persentasiepunte teruggesak het.

Herbert Japhta (DA) het 1 222 stemme gekry, teenoor 923 vir die ANC en 78 vir die EFF.

Die DA se suksesse het voortgeduur in Gauteng, en wel in wyk 8 aan die Wes-Rand, wat Randfontein en Westonaria omsluit.

Donovan Cloete (DA) het die wyk vir sy party behou met 664 stemme teen 508 vir die ANC, 119 vir die EFF en 12 vir die ACM. Dis ʼn swaai van vyf persentasiepunte na die DA.

Die ANC het twee wyke in Johannesburg behou. Wyk 50 is Dobsonville, en hier is Bheki Mgaga (ANC) verkies met 2 605 stemme teen 399 vir die EFF, 252 vir ʼn onafhanklike kandidaat, 198 vir die DA en 177 vir die ATM. Die swaai teen die ANC is vyf persentasiepunte.

Johannesburg wyk 122 is ʼn uitgestrekte en redelik landelike gebied tussen Soweto en Lenasia. Die nuwe raadslid is Nkosephayo Zungu (ANC), wat 4 164 stemme gekry het teen 636 vir die EFF, 445 vir die DA, 160 vir die IVP, 126 vir die ACDP, 112 vir die ATM en 36 vir die NFP. Die steun vir die ANC het met vier persentasiepunte toegeneem.

In die Oos-Kaap het die DA en die ANC elk ʼn wyk behou.

Graaff-Reinet se wyk 2 is die Horseshoe-gebied en Nieu-Bethesda. Die nuwe raadslid is Ricardo Smith (DA) wat die ANC geklop het met 1 252 stemme teen 337. Die swaai na die DA is twee persentasiepunte.

Cofimvaba se wyk 18 is ʼn stuk landelike Transkei. Lusanda Makade (ANC) het gemaklik geseevier met 1 356 stemme teen 355 vir die UDM en 81 vir die EFF. Dit verteenwoordig ʼn swaai van agt persentasiepunte teen die ANC.

In KwaZulu-Natal het die ANC twee landelike wyke behou, een in Zoeloeland en een in die Drakensberg.

Bergville wyk 4 lê tussen die dorp en die grens met Lesotho. Die nuwe raadslid is Manqoba Hlatswayo (ANC), wat 1 039 stemme gekry het teen 783 vir die IVP. Die NFP was derde met 719 stemme, gevolg deur die EFF met 348, die ATM met 50 en Cope met 27. Die swaai teen die ANC is 17 persentasiepunte.

In Vryheid wyk 21 (ʼn landelike gebied buite eMondlo) het Nkosinathi Mkhwanazi (ANC) net-net gewen met 1 154 stemme teen 1 097 vir die IVP. Die NFP het 42 stemme gekry en die EFF 20. Die swaai na die ANC is vyf persentasiepunte.

Laastens was daar ook ʼn tussenverkiesing in Mpumalanga, en wel in wyk 6 van Carolina se munisipaliteit, te wete die landelike gebied Masondeza.

Sibusiso Dube (ANC) het 1 385 stemme gekry teen 109 vir die EFF en 96 vir die IVP. Dis ʼn  swaai van sewe persentasiepunte na die ANC.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

28 Kommentare

jongste oudste gewildste
Laetitia

Well Done DA !!

Genieve

Baie geluk vir die DA nou moet julle net na die mense se behoeftes omsien asb ek sien dis jongerbloed welgedaan.

Joe

Pfffft toe vat ANC Lite die wyk oor.

Leon

Baie geluk DA dinge lyk goed. Wes Kaap bly DA wereld, bes bestuurde provinsie

Alida

Baie geluk hou so aan ASB !!!