DA nooi Cele na vuurwapenberaad

Bheki Cele, minister van polisie (Foto: Jairus Mmutle/GCIS)

Die DA het Bheki Cele, minister van polisie, genooi om as ’n spreker op te tree by sy vuurwapenberaad wat volgende week gehou word.

“Die DA is van mening dat dit belangrik is dat die minister aan hierdie geleentheid deelneem om hom die geleentheid te bied om die regering se standpunt oor die omstrede wysigingswetsontwerp oor vuurwapenbeheer te verduidelik,” het Andrew Whitfield, DA-LP en die party se woordvoerder oor polisie, gesê.

Die vuurwapenberaad sal Dinsdag plaasvind en volgens die DA sal burgerlike organisasies, akademici, verskillende belangegroepe en lede van die publiek deel van die aanlyn geleentheid wees.

“Die beraad sal die geleentheid bied om die wetgewing volledig uit te pak, te verstaan en te bespreek. Ons vertrou dat die minister politiek opsy sal skuif en ons uitnodiging sal aanvaar.”

Volgens Whitfield is die DA sterk gekant teen die “drakoniese” wysigingswetsontwerp en het 73 000 Suid-Afrikaners ook reeds hul teenkanting daarvoor gewys deur ’n DA-petisie te onderteken.

“Die Suid-Afrikaanse Polisiediens is in ’n toestand van wanorde en versuim klaaglik om misdaad in hierdie land te beveg. Dit is net verbysterend dat enige regering met ’n wetsontwerp vorendag sal kom wat wetsgehoorsame burgers aan die genade van misdadigers oorlaat.” Die DA se vuurwapenberaad sal om 10:00 Dinsdag regstreeks op die party se sosialemediakanale uitgesaai word.

Ian Cameron.

Ian Cameron, stigter van firearms.co.za en woordvoerder van Safe Citizen, het die DA se beraad verwelkom. “Die beraad is heeltemal nodig vir die meerderheid van wetsgehoorsame burgers om ’n stem te kry in hierdie saak van groot kommer.”

Oor kritiek teen Whitfield omdat hy as lid van die parlementêre portefeuljekomitee oor polisie só ʼn beraad reël, het Cameron gesê dít moet die DA nie verhinder om aan regmatige belanghebbendes en die breë publiek die belangrike geleentheid te bied om gehoor te word nie.

Volgens Cameron word belangrike belanghebbendes in die vuurwapendebat al jare lank uitgesluit van sinvolle konsultasie, terwyl diegene wat gekant is teen privaat vuurwapenbesit voorkeur geniet.

“Wetsgehoorsame burgers het die geleentheid om te verenig in hierdie baie belangrike stryd vir hul grondwetlike regte wat veiligheid en sekuriteit betref. Die voorgestelde wysigingswetsontwerp, wat in die openbaar deur Cele geborg word, het die potensiaal om die brose veiligheid van wetsgehoorsame burgers te ondermyn in ’n land wat deur die minister self as ’n oorlogsone beskryf is.”

Tina Joemat-Peterson. (Foto: SAPA)

Tina Joemat-Pettersson, voorsitter van die parlementêre portefeuljekomitee oor polisie, het vroeër haar kommer uitgespreek oor die DA se beplande vuurwapenberaad.

“Die komitee is bekommerd dat Whitfield gekies het om die kwessie van vuurwapens te politiseer wanneer alle lede van die komitee saamwerk sonder om sake wat ons raak, te politiseer.”

Volgens Joemat-Pettersson sal die DA se vuurwapenberaad ʼn aantal mense en belanghebbendes uitsluit, onder wie lede van die parlementêre portefeuljekomitee vir polisie wat tans met die kwessie getaak is.

“Ons het die kwessie van ʼn beraad deurgaans geopper tydens die portefeuljekomiteevergaderings waarvan Whitfield deel was.” Joemat-Pettersson het gesê daar is tydens ’n vergadering op 22 April, wat Whitfield nie bygewoon het nie, ooreengekom dat ’n beraad gehou moet word.

“Whitfield het egter voortgegaan met die DA se beraad sonder om navraag te doen oor die beraad wat deur die komitee beloof is. Hy mislei die publiek oor die aangeleentheid.” Volgens Joemat-Pettersson sal die komitee se vuurwapenberaad in Julie plaasvind.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

31 Kommentare

jongste oudste gewildste
Hennie

Die DA het high hopes! Die ou piesanghoed sal net ‘n klomp stats voor gooi wat hy uit sy vrot duim gesuig het!

melaney

Indien cele ‘n paar minute het in sy besige lewe om aan die DA af te staan……maar ek glo nie. Hy drentel op die strand rond op soek na ‘n swemmer.

Louwrens

Die wetgewing van hoed is belaglik. Hy homself kan nie sonder gewapende lyfwagte rondgaan nie want hy is bang vir sy eie mense. Hy het geen cooking clue van wat ons as publiek moet deurmaak nie. Ek het al met heelwat anderskleuriges gepraat en selfs hulle se die hoed tas daai man se brein sleg aan.
Ek sê doen weg met hom, hy gaan nog baie mense onnodig laat seerkry ….

Nie Verbaas

“Die komitee is bekommerd dat Whitfield gekies het om die kwessie van vuurwapens te politiseer wanneer alle lede van die komitee saamwerk sonder om sake wat ons raak, te politiseer.” Die ANC het alreeds die kwessie van vuurwapens verpolitiseer. Waarvoor wil hulle wetsgehoorsame burgers se wapens om hulself teen kriminele mee te verdedig wegneem?

Hendrik Marthinus

Hy werk vir die regerende party nie die DA nie.
Dus nie Sy werk nie, as ek hy is se ek betaal my as ek n spreker moet wees vir n vergadering wat deur die DA gereel word, O ja en eks Baie duur.