DA pak VF Plus oor Afrikaans: ‘Hensop julle?’

Die amptelike opposisie het die VF Plus geroskam oor sy beweerde oorgawe in die stryd om die behoud van Afrikaans, veral op hoër vlak. (Argieffoto: pixabay)

Die DA het die VF Plus oënskynlik nou stormgeloop in die voortgesette herrie oor Afrikaans as inheemse taal.

Dr. Leon Schreiber, die DA se kiesafdelingshoof vir Stellenbosch, sê uit ʼn verklaring van die VF Plus lyk dit of die party “hensop in die geveg om ʼn vooruitstrewende en volhoubare toekoms vir Afrikaans in Suid-Afrika te vestig”.

“Terwyl die DA onverpoos voortveg téén die minister van hoër onderwys, Blade Nzimande, se haatdraende poging om Afrikaans as ‘uitheems’ te klassifiseer, sowel as teen die aanslag teen Afrikaans aan die Universiteit Stellenbosch, het die VF Plus se dr. Wynand Boshoff Vrydag te kenne gegee dat sy party geen toekoms vir Afrikaans in Suid-Afrika sien nie,” sê Schreiber.

Hy verwys na ʼn verklaring van Boshoff waarin dié sê “ʼn minderheid wat nie sowel swart as Engelssprekend wil word nie, sal vroeër of later vir selfbeskikking moet kies – of hul identiteit tot die privaatste van private ruimtes beperk”.

Boshoff sê in sy verklaring die huidige debakel oor die status van Afrikaans as inheemse – of dan uitheemse – taal, lê die grondliggende mislukking van die skikking van 1994 bloot.

“Dit is net jammer dat almal wat aan die gesprek deelneem, dit blykbaar nie besef nie.

“Voor die huidige debat bespreek word, moet ʼn mens na die grondliggende vraag kyk: Is Afrikaans inheems, of nie?

“Die VF Plus se antwoord is onomwonde ‘ja’, sonder om te ontken dat iemand uit ʼn ander hoek die teenoorgestelde gevolgtrekking kan maak.”

Boshoff verduidelik in die verklaring die oorsprong van Afrikaans en sê onder meer die “uitheemse” kenmerke van hierdie taal is duidelik – nes die “inheemse” kenmerke daarvan.

“Die meningsverskil is nie taalkundig nie, maar polities.”

Die DA het Nzimande vroeër by die Menseregtekommissie (MRK) verkla oor sy klassifisering van Afrikaans as uitheems en Boshoff sê in sy verklaring om by die MRK te kla, is soos om “Koning Leeu by Jagluiperd vir wreedheid te verkla”.

Schreiber sê pleks daarvan om in die kryt te klim “en saam met die DA te veg vir taalregte”, het Boshoff die DA se klagte probeer afmaak. “Net so verbysterend is dat Boshoff skynbaar ook Nzimande se haatlike klassifisering van Afrikaans probeer verdedig deur aan te voer dat die ‘uitheemse kenmerke’ van die taal duidelik is.”

Hy sê die VF Plus was die afgelope paar jaar afwesig in die stryd om Afrikaans se toekoms en hoewel die party praat oor sy verbintenis tot Afrikaans, is die VF Plus volgens hom nie betrokke by praktiese gevegte vir Afrikaans nie.

“Waar die VF Plus blykbaar nou die wit vlag gehys het in die geveg om prakties uiting te gee aan die taalregte soos verskans in ons grondwetlike demokrasie, stel die DA geensins daarin belang om te hensop nie. Die DA verdedig nie Nzimande se haatlike klassifisering van Afrikaans nie – ons verwerp dit vir die ongrondwetlike diskriminasie wat dit is.

“Die DA hensop nie oor die toekoms van Afrikaans en ons grondwetlike demokrasie nie – ons kry eerder ons hande vuil en veg om die grondwetlike regte van Afrikaanssprekendes prakties te laat geld.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

49 Kommentare

jongste oudste gewildste
Hardekwas

Patetiese stemwerf poging van die da. Julle dae is getel.

annie

Nogal Afrikaners roskam… Hoeveel Afrikaners is in top poste in die DA? Helen Zille het min of ooit Afrikaans gepraat en John… wanneer voorheen? Maar die VF Plus se nuwe strategie om kamma vreeslik besorg te wees oor Kleurlinge wat Afrikaans praat en Kleurlinge wat weer kamma aanklank vind by Afrikaners (want ons is bereid om duur te betaal vir hul stemme.). Wat ‘n speletjie… Iets soos musical chairs in Afrikaans wat in vroteiertjie sal ontaard.

Werner

DA julle is omtrent desperaat toe nou agterkom dat die Afrikaanses se stemme iets beteken.Net jammer ons het n verstand ook .Julle goedkoop slenters gaan nie werk nie hoor.

Zombie

Werklik pateties van die DA om ń argument so te verdraai.

JM

Dr. Wynand Boshoff se reaksie is uiters teleurstellend.