DA sal hof toe indien Motsoeneng-ondersoek nie voortgaan

Hlaudi Motsoeneng Foto: news.iafrica.com

Hlaudi Motsoeneng Foto: news.iafrica.com

Die DA het Sondag gesê die party sal regstappe doen indien die dissiplinêre ondersoek na Hlaudi Motsoeneng, die SAUK se omstrede bedryfshoof, nie voortgaan nie.

Dit volg nadat William Mokhari, die voorsitter van die dissiplinêre komitee, Donderdag die dissiplinêre proses teen Motsoeneng gestaak het hangende ʼn appèlproses teen ʼn vorige beslissing deur die Wes-Kaapse hooggeregshof waartydens Motsoeneng se aanstelling ter syde gestel is.

James Selfe, die Demokratiese Alliansie (DA) se federale uitvoerende voorsitter, het gesê die party glo die redes wat aangevoer is vir die staking van die dissiplinêre proses teen Motsoeneng is onwaar en wetlik ongegrond. “Berigte wat nou aandui dat Motsoeneng kan terugkeer werk toe nadat die dissiplinêre proses gestaak is, is bloot verregaande. Dissiplinêre verhore is nie opsioneel of voorwaardelik nie, maar noodsaaklik soos deur die appèlhof beveel,” het Selfe gesê.

Die appèlhof het in Oktober beslis dat Motsoeneng vir 60 dae geskors word terwyl ʼn tugverhoor vir sy beweerde oortredings gehou word. Hy is verlede jaar permanent aangestel as die uitvoerende bedryfsbeampte van die SAUK, ondanks bevindings deur die Openbare Beskermer dat sy aanstelling onregmatig was en hy buitensporige salarisverhogings ontvang en oor sy kwalifikasies gelieg het.

Selfe het gesê Motsoeneng en die SAUK se vroeëre uitsprake dat hulle die dissiplinêre proses verwelkom, is bloot deel van ’n “gedwonge poging om hulself te distansieer van duidelike pogings om die dissiplinêre proses te bemoeilik”.

“Die mees onlangse optrede deur die dissiplinêre voorsitter getuig van ʼn duidelike oëverblindery om die proses nog verder te vertraag. Die feit bly dat die wetlike posisie teen mnr. Motsoeneng duidelik en eenvoudig is. Die SAUK moet onmiddellik die dissiplinêre proses herinstel, anders sal die DA geen keuse hê as om die uitsaaier te dwing om aan die appèlhof se opdrag te voldoen nie,” het Selfe gesê.

“Beskerming van Hlaudi Motsoeneng deur die buiging van reëls is nie in ooreenstemming met die grondwetlike grondslag waarop die uitsaaier gestig is nie. Die oppergesag van die gereg moet seëvier.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

2 Kommentare

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.