DA se valbyl gestel vir De Lille

Patricia de Lille, burgemeester van Kaapstad (Foto: Patricia de Lille / Facebook)

Die DA se politieke valbyl is gestel vir die nek van die Kaapse burgemeester, Patricia de Lille, en wanneer die son vanaand sak, kan haar kop rol.

Die DA se koukus in die Kaapse metroraad vergader naamlik laat vanmiddag om ʼn mosie van wantroue in haar te bespreek. Kragtens die DA se nuwe terugroep-klousule moet sy dan binne 48 uur as burgemeester bedank of anders verloor sy haar DA-lidmaatskap, wat in elk geval kragtens Suid-Afrika se proporsionele stelsel sal beteken dat sy haar setel en dus ook haar burgemeesterskap kwyt sal wees.

Dis nog nie presies seker hoe laat die koukusvergadering gaan plaasvind nie, want daar is eers ʼn stadsraadsvergadering wat vanoggend 10:00 begin. Die lengte van ʼn stadsraadsvergadering is moeilik om vooraf te bepaal, maar die verwagting is dat dit teen 17:00 afgeloop sal wees – as alles normaal en volgens plan verloop.

Daarna sal die DA-koukus vergader, en ʼn aanduiding van hoe ernstig die federale bestuur van die DA die saak opneem is dat die ondervoorsitter van die party se federale raad, Thomas Walters, persoonlik ʼn oog oor die gebeure sal hou.

Daar is groot verdeeldheid in die Kaapse DA-koukus oor optrede teen De Lille. Tydens verlede week se aanvra van die mosie van wantroue in haar het 77 lede daarvoor gestem, 39 daarteen, 11 het buite stemming gebly en 23 het glad nie opgedaag nie.

Dit is nietemin duidelik dat haar teenstanders die oorhand het en dat die valbyl vanaand, min of meer met sononder, gaan val.

Twee vrae kom dan op: Wat gaan sy doen, en wat gaan die DA doen?

Wat De Lille betref het sy drie opsies: Eerstens, bestry die wettigheid en grondwetlikheid (binne die land se Grondwet) van die DA se terugroep-klousule. Tweedens, aanvaar die uitslag en haar ontslag en verdwyn stil-stil van die politieke toneel. Derdens, sluit mettertyd by ʼn ander party aan. In laasgenoemde verband het die EFF en die ANC reeds die deur wyd vir haar oopgemaak.

Wat die DA betref sal ʼn opvolger vir haar aangewys moet word. Gegewe die opsies gaan dit waarskynlik ʼn valer, verveliger en plooibaarder politikus wees, wat groot polvye gaan moet volstaan en ʼn taai taak gaan hê om haar na te doen as die rekord van ʼn tweederde meerderheid in Kaapstad aanstaande jaar herhaal wil word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

21 Kommentare

jongste oudste gewildste
Piet Snot

Die DA se politici bedryf (weereens) politiek ter wille van hulself, en nie landsbelang nie.

Stefan

Ek dink die DA maak n groot fout !!!

Rynhardt

De Lille pas nie in by DA en Maimane se nuwe grondwet nie.Haar tyd is lankal verby.Sy sal nuwe politieke tuiste deur Anc of EFF aangebied word.Sy sal natuurlik eers n perskonferensie hou om uit te spel hoe stief ???sy deur die einste liberale DA(wat sy oor al die jare aanbid het)behandel is.Sodoende is sy weer aanvaarbaar vir haar nuwe politieke tuiste?????en gelukkig!?☺???

URSULA

sterkte hou jou kop hoog

Stephen Namibia

Ek stem saam met Piet Snot. Ek verstaan nie hoe die DA in hierdie uiters sensitiewe politieke tye met De Lille n geveg kan aanknoop nie. Die ANC wag soos aasvoels om munt daaruit te slaan.
Die DA sal beslis steun verloor onder die kiesers. De Lille het baie aanhangers.