DA staan ook voorgestelde wysigings aan Wet op Private Sekuriteitsbedryf teen

Foto ter illustrasie. (Foto: pixabay)

Die DA sê voorgestelde wysigings aan die Wet op die Regulering van die Private Sekuriteitsbedryf (sogenaamde Psira-wet) striem ʼn bedryf wat die veiligheid van miljoene Suid-Afrikaners probeer verbeter.

Hy het reeds die voorgestelde wysigings wat die minister van polisie, Bheki Cele, op 31 Mei in die Staatskoerant afgekondig het, teengestaan.

Die voorgestelde wysigings sluit in dat “semi-outomatiese wapens” voortaan slégs gebruik mag word deur veiligheidsbeamptes wat geldwaens beskerm.

Van die ander voorstelle wat afgekondig is, hou verband met die uniforms wat private veiligheidsbeamptes mag dra. Ingevolge die voorgestelde wysigings mag dit nie lyk soos, of verwar kan word, met enige uniform van onder meer die polisiediens, weermag of korrektiewe dienste nie. Dit sluit enige blou of kamoefleerdrag in.

Die voorgestelde bepalings plaas ʼn onnodige las op die private veiligheidsbedryf, administratief en finansieel, en plaas ʼn te groot konsentrasie van mag in die hande van die reguleringsowerheid vir die private veiligheidsbedryf (Psira), het Andrew Whitfield, die DA se skaduminister van polisie, in ʼn verklaring gesê.

Whitfield sê dit verwys veral na magte wat eintlik by die Suid-Afrikaanse polisiediens moet berus.

“Wat veral kommer wek, is die klaarblyklike duplisering van die Sentrale Vuurwapenregister, wat deur die Wet op Vuurwapenbeheer gestalte kry en nié deur die Psira-wet nie, waaraan dié regulasies toegeskryf word,” het hy gesê.

“Dit is ook kommerwekkend dat die minister die wysigings aan die wet wil deurdruk, terwyl die Psira-wysigingswet sedert 2014 op die president se lessenaar lê. Die DA staan dié wysigingswet steeds teen, maar ons glo die president moet ʼn formele aankondiging doen oor sy besluit daaroor, voordat hy enige bepalings in terme van die wet oorweeg.”

Whitfield sê Cele moet eerder daarop fokus om die polisie reg te ruk. Hy sê net verlede jaar is 800 vuurwapens by polisielede gesteel en word nou gebruik in bendeoorloë en die pleeg van geweldsmisdaad.

“Terwyl die minister van polisie se aandag afgelei word daarvan om ʼn behoorlike polisiediens te verseker, ly Suid-Afrikaners steeds onder misdadigers en geweld. Nou is nie die tyd vir wysigingswetgewing nie, nou is die tyd vir beslissende optrede om te verseker die polisie is toegerus om die veiligheid van Suid-Afrikaners te verseker.”

Die organisasie Gun Owners South Africa (Gosa) het vroeër aan Maroela Media gesê, indien nodig, sal hy die voorgestelde wysigings tot in die hof beveg.

Belanghebbendes het tot 30 Junie gehad om kommentaar op die voorstelle te lewer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

27 Kommentare

jongste oudste gewildste
KrokodilBotha

Die DA sit op die draad. Hulle is dan gekant teen wettige eienaarskap van vuurwapens?!!!!!

Maljan

Eers mag n huisbewoner nie skiet om sy gesin, self en of eiendom te verdedig nie. Toe mag die polisie nie teen vandale in die naam van betogers optree nie. Toe qord die rooimiere werkloos huis toe gestuur. Nou word die sekuriteitsbedryf sê tande getrek. Publiseer asseblief elke minister, elke hoë anc, eff en blf lid se plase se ligging asook huisadres sodat diewe en kwaad doeners weet waar om te gaan oes.

Essie

Ek het net 1 vraag waarom mag die bendes ,skurke en kapers semi of outomatiese gewere gebruik en wetstoepassers moet te vrede wees met gewone wapens

Louis Steyn

Ek is baie verbaas dat daar geen nuusflitse of enigiets is met betrekking tot die Cravenweek nie.

Andreas

Dit is nogal interessant dat die DA in die dae oor sekere sake wat vir boere en die Afikaner na aan die hart lê hul stem laat hoor.