DA vat Ramaphosa hof toe oor spioenbaas

Mmusi Maimane, leier van die DA (Foto: Twitter via ANA)

Die eerste groot botsing tussen pres. Cyril Ramaphosa en die DA is op hande – en dit gaan oor die aanstelling van die land se omstrede voormalige spioenbaas, Arthur Fraser, as direkteur-generaal van korrektiewe dienste.

Dit is die grootste omstredenheid nóg sedert Ramaphosa twee maande gelede president geword het.

Mmusi Maimane, DA-leier, het aangekondig sy party gaan Ramaphosa se besluit om Fraser aan die hoof van Suid-Afrika se tronke te plaas, deur die hof laat hersien.

Maimane het Ramaphosa Woensdag gevra of hy Fraser se beweerde onwettige gedrag as hoof van die Staatsekerheidsagentskap (SSA) in ag geneem het toe hy hom as direkteur-generaal van staatsekerheid aangestel het, en hy het die staatshoof tot 16:00 gistermiddag gegee om ʼn antwoord te verskaf.

Maimane het Ramaphosa ook gevra waarom Fraser juis na korrektiewe dienste ontplooi is, aangesien hy geen ervaring van tronkbestuur het nie.

Nou het die DA besluit om die hof te vra om Fraser se aanstelling voor die hof te daag op die gronde dat dit nie prosedureel of substantief rasioneel was nie. Dit herinner baie aan die gronde waarop die party ʼn paar jaar gelede suksesvol voor die hof geargumenteer het dat die aanstelling van adv. Menzi Simelane as nasionale direkteur van openbare vervolging irrasioneel en dus ongeldig was.

Gister het die adjunkminister van justisie en korrektiewe dienste, Thabang Makwetla, in die parlement gesê dat dit Ramaphosa was wat besluit het om Fraser as direkteur-generaal aan te stel – die departement van korrektiewe dienste het niks daarmee te doen gehad nie.

Ramaphosa se woordvoerder, Khusela Diko, was nie vir kommentaar beskikbaar nie.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

21 Kommentare

jongste oudste gewildste
Genieve

Hier hang darem nou baie toue om CR se nek vandat hy as president inghuldig is nie altyd maklik om n leier te wees nie.

Cherokee

Waar kom die DA se finansies vandaan? Nie ‘n kritiese vraag nie, alles behalwe! Net nuuskierig want terwyl ek hou van vele van hul aksies soos hierdie, is dit ook duidelik dat hulle geld spandeer asof uit ‘n bodemlose put.

Tokkolos

Shame DA voel jul nou afgeskeep met afriforum wat nou als try ingooi maar self gaan versuip Sterkte vir julle Ek kry gou die popcorn

Danien

Ja die toue gaan begin styf trek. Cyril is maar net nog n Jacob Zuma wat net n ander baadjie aan het. Hy stel net mense aan in poste soos Zuma geen ondervinding en vol korrupsie. Malema se dinge kom nou in die ope en een van die dae sal Cyril se foute ook begin uitstaan soos n pitseer.

L

Vandat ou Frazer daar is, ontsnap die maaitjies een na die ander… Hhmmmm heeltemal TE toevallig!