Dagsorg verduidelik ná herrie oor foto

Die foto wat op sosiale media versprei is.

Die foto wat op sosiale media versprei is.

“Ons is baie veiligheidsbewus en neem die voorval ernstig op,” het Bertha Roux, ʼn voormalige onderwyseres en eienaar van ʼn plaaslike dagsorgsentrum in Heidelberg in Gauteng, gesê nadat ʼn foto van ʼn seuntjie, wat agter uit die sentrum se bewegende oop bakkie hang, vandeesweek aan die lig gekom het.

Die foto is vandeesweek op die Facebook-groep,  Jy Bestuur / Parkeer Soos Jou G*t – Heidelberg, Nigel, & Omliggende Gebiede, geplaas, waarna dit soos ʼn veldbrand versprei het, met mense wat hul misnoeë uitspreek. Die oorspronklike plasing is sedertdien verwyder.

Roux, eienaar van die Kleuter Bokkies-dagsorgsentrum, het Vrydag aan Maroela Media gesê dit is die eerste keer in die vyf jaar wat die sentrum bestaan, dat so iets gebeur.

“Die sentrum is presies 350 m van Laer Volkskool Heidelberg geleë. As ons stap, neem dit vier minute,” het sy gesê. Sy het verduidelik haar man, Buks, laai in die middae klein groepies kinders, afhangende van hul buitemuurse aktiwiteite, by die laerskool op om hulle na die naskoolsentrum te bring.

“Van die kinders sit voor saam met hom en soms sit die kinders agter. Dit was die eerste keer waarvan ons bewus is dat ʼn kind oor die agterkant geklouter het,” het sy gesê.

Sy het gesê sy wens die motoris wat die foto geneem het, het Buks dadelik daaroor ingelig. “Hy kon dan dadelik opgetree het, want dit is baie gevaarlik. Gelukkig het die seuntjie nie seergekry nie.”

Roux het gesê ʼn kap “gaan vandag nog” op die bakkie gesit word sodat so iets nie weer gebeur nie. “Ons gaan ook bankies en ʼn brandblusser laat installeer. Dit sal alles oor die naweek volgens bepalings van die verkeerswet gedoen word,” het Roux gesê.

Sy het gesê die kinders se ouers was bewus daarvan dat hul kinders op ʼn oop bakkie vervoer is en dat hulle vrywaringsvorms geteken het. “Die ouers verstaan die situasie [rondom die foto] en ondersteun ons. Die betrokke seun (6) se ma het met hom geraas omdat hy hom soos ʼn apie gedra het.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

161 Kommentare

jongste oudste gewildste
Speedguard

Geen vrywaring dokument werk as daar nalatigheid betrokke is nie, geen mens mag of kan sy gesondheid of veiligheid wegteken nie !

IR

“Met hom geraas omdat hy hom soos ‘n apie gedra het.” – Ai, wat is fout met die ouers ook? Al daardie kinders hoort nog in karstoeltjies, vasgegespe en behalwe vir dit sover ek weet is dit wet dat alle persone ‘n gordel moet dra. Daardie kap vir die bakkie gaan niks in ‘n ongeluk help nie. Ek kan nie glo mense is so non-chalant nie.

Karma

Wáááát????!!!!!! Kinders van ‘n kleuterskool word oop en bloot op ‘n oop bakkie vervoer en die kinders se ouers weet daarvan en ondersteun die kleuterskool????? Nee, daai vrou se kleuterskool-lisensie moet ingetrek word. Nommer 1: ‘n oop bakkie is nie geskik vir die vervoer van mense nie VERAL nie kinders nie (een daarby nog sulke kleintjies ook!). Nommer 2: dit is teen die wet om mense op ‘n oop bakkie te vervoer. Nommer 3 …. Ek ….. ek is nou so kwaad dat ek niks verder kommentaar kan lewer nie.

Hannah

Self met n kappie op is dit in my opinie gevaarlik agter op n bakkie

Sarel Strydom

Dit is eerstens uiters onverantwoordelik van ‘n Dagsorgsentrum om kinders agter op ‘n oop Bakkie te vervoer. Dit is ander ouers se kindrs wat in jou sorg is. Vervolgens is dit net so gevaarlik wanneer ma’s hulle kinders in ‘n motor vervoer met selfoon teen die oor vasgeplak.Niemand kla egter ooit daaroor nie. Ek wens ek kan ‘n foto neem van elke ma wat so motor bestuur.