Damwal in Krugerwildtuin met plofstof gesloop

Die Kanniedood-damwal. Foto: Pathfinda

Sekere roetes in die omgewing van die Kanniedood-dam en Shingwedzi-kamp in die noorde van die Krugerwildtuin is tydelik gesluit vir die sloop van ʼn oorbodige damwal.

Die wildtuin het Vrydag in samewerking met die weermag begin om die oorblywende deel van die Kanniedood-dam op die S50, sowat 9 km suidoos van die Shingwedzi-kamp, te begin sloop. Die sloping van die damwal duur tot 6 Desember.

Isaac Phaahla, woordvoerder van die wildtuin, het gesê plofstof word gebruik om die struktuur te sloop. Veldwagters en brandbestrydingspanne van die weermag sal op bystand wees om enige brande wat moontlik kan ontstaan, te blus.

Volgens Phaahla is diere voor die tyd uit die omgewing gejaag en is daar ook lugondersteuning ingespan om te verseker dat geen mense of diere in die omgewing was voor die plofstof gebruik is nie.

Die Kanniedood-damwal is tydens die vloede in Januarie 2013 beskadig. Dit het tot gevolg gehad dat die rivier ʼn nuwe kanaal verby die oorblyfsels van die damwal gevorm het. “Die damwal het dus na die vloede oorbodig geraak,” het Phaahla gesê.

Die wildtuin het ’n beleid vir kunsmatige watervoorsiening wat die sluiting en verwydering van kunsmatige waterpunte moontlik maak. “Kunsmatige watergate waar water nie voorheen natuurlik voorgekom het nie, het tot talle ekologiese probleme gelei, soos erosie en agteruitgang van die omgewing,” verduidelik Phaahla.

Bewaringsbestuur doen dus stappe om hierdie negatiewe gevolge reg te stel deur sekere kunsmatige watergate te sluit en te sloop.

Die S50-grondpad vanaf die S143-aansluiting in Shingwedzi tot by die S143-aansluiting by Mooiplaas sal tydens die sloping van die Kanniedood-damwal gesluit wees.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

26 Kommentare

jongste oudste gewildste
Elsa

Ons het die mooiste diere daar gesien.. Maar parkeraad sal die beste weet.

Johan

Mr Paahla – Fences around the Kruger is also artificial though necessary – we hope you are well informed by closing various waterholes?

Naam

Aggenee! Hulle kon net die grondwal herstel het! Dis ‘n groot skade wat nou daar aangejaag word!

Scalla

Hoekom nie herstel of opgradeer nie, water is skaars,breek net af.

Willem Grobler

Die kolonel het altyd gesê plofstof is wit poeier wat jy in jou onderbroek gooi. Springstof daarenteen…